Damýdyń birden-bir qozǵaýshy kúshi – bilim. Básekelestik zamanynda dúnıeniń kóshinen qalmaý úshin bilim berý júıesin zamanaýı deńgeıde jańartyp otyrý ózekti. Sondyqtan elimizdegi mektepterdiń jańa tehnologııalyq júıege birtindep ótýi – quptarlyq is. Osy oraıda qarapaıym mektep muǵalimi retinde ózimniń kókeıge túıgenderimdi ortaǵa salsam deımin. Dástúrli bilim berýge úırenip qalǵan biz, oqytýshylar qaýymy á degende mundaı jańashyldyqqa tosyrqaı qaraǵanymyz shyn. Keıbireýler muny «sheteldiń daıyn tehnologııasy ǵoı» dedi. Shyn máninde solaı ma? Keıin úńilgenimizde, bul Nazarbaev zııatkerlik mektepterinde tájirıbeden ótip, kem-ketigi túzelgen, ábden shyńdalǵan júıe ekenine kózimiz jetti. Jańa tehnologııalyq oqytýǵa ótý – keleshekte eń qýatty memleketter qatarynan kórinýine jol ashatyn birden-bir jol.
Elbasynyń «100 naqty qadam» Ult josparynda kórsetilgen basty basymdyqtardyń biri – kásibı bilikti memlekettik qyzmet apparatyn jasaqtaý bolyp tabylady. Osy maqsatta Ulttyq ulan «Ońtústik» óńirlik qolbasshylyǵy uıymdastyrǵan baıqaýdyń nátıjesinde úzdik sardarlar anyqtaldy. Baıqaý jeńimpazdaryn Ulttyq ulan «Ońtústik» óńirlik qolbasshylyǵynyń qolbasshysy general-maıor Qaırat Aqtanov saltanatty túrde marapattady.
Áskerı bólimshelerdegi jaýyngerlik daıyndyqty jetildirý, ofıserlerdiń biliktilikterin arttyrý, batalon, rota, vzvod boıynsha laýazymdyq tulǵalardy irikteý jáne tájirıbe almasý maqsatynda uıymdastyrylǵan baıqaýǵa «Ońtústik» óńirlik qolbasshylyqqa qarasty 11 áskerı bólimnen iriktelgen 38 ofıser qatysty. Olar Qyzylorda, Ońtústik Qazaqstan, Jambyl, Almaty oblystary jáne Almaty qalasyndaǵy áskerı bólimderden qatysqan bolatyn.
«Ulttyq ulan áskerı qyzmetshisinen atqarar mamandyǵy boıynsha bilimi men biliktiligi tıisti talapqa dálme-dál, júz paıyzdyq deńgeıde saı bolýy talap etiledi. Áskerimizdiń orta býyn komandırleri – ofıserler, kelisimshart negizindegi áskerı qyzmetshiler jáne sarbazdardy oqytyp, tárbıeleýmen aınalysatyn adam. Mine, sondyqtan da, úzdikterdi irikteý maqsatynda osyndaı baıqaý uıymdastyryp otyrmyz. Bul baıqaý eń áýeli Ulttyq ulan ofıserlerin kásibı turǵyda shyńdalýǵa, bilim-biliktilikterin ushtaýǵa jáne de óz eliniń patrıoty bolýǵa úndeıdi», dedi «Ońtústik» óńirlik qolbasshylyǵynyń qolbasshysy general-maıor Qaırat Aqtanov.
Bul baıqaý kezinde áskerılerdiń teorııalyq bilimderimen qatar tájirıbelik qarym-qabiletteri de synaldy. Olar sheshýshi kezeńde qarýdan atyp, jaýyngerlik daıyndyqtaryn synǵa saldy. Aqtyq kezeńniń alǵashqy kúni ofıserler saptyq daıyndyqtaryn, memlekettik til, qyzmettik taktıka, jalpyáskerı jarǵylar boıynsha bilimderin jáne de jeke quramdy uıymdastyrý biliktilikterin tanytty. Baıqaýda osal ofıser joq, árqaısy erekshe daıyndyqpen kelgenderin kórsetti. Aıta ketetini, ońtústik óńirdiń túkpir-túkpirinen kelgen sardarlar baıqaýdan tys ýaqytta Almatydaǵy 28 panfılovshy batyrlarǵa arnalǵan saıabaqqa baryp, Dańq memorıalyna taǵzym jasap, gúl shoqtaryn qoıdy.
Jeńimpazdar men júldegerlerge Qazaqstan Ulttyq ulany «Ońtústik» óńirlik qolbasshylyǵy qolbasshysynyń buıryǵymen dıplom, gramotalar jáne baǵaly syılyqtar berildi. Sondaı-aq baıqaý barysynda Ardagerler keńesiniń tóraǵasy Gennadıı Faleev jeńimpazdardy Baýyrjan Momyshuly atyndaǵy «Batyr shapaǵaty» medalimen marapattady.
Saparbaı PARMANQUL, «Egemen Qazaqstan»
ALMATY