Ońtústik Qazaqstan oblysynda memlekettik «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» qarqyndy júzege asyp keledi.
Atalǵan baǵdarlama aıasynda óńirde oblys ákimdiginiń «Ár aýylǵa óz sheberi» jobasy qolǵa alynǵan bolatyn. Sonyń nátıjesinde árbir aýdanda qajetti degen salalarǵa mamandar daıarlanýda.
Máselen, qazirgi tańda Saryaǵash aýdanynda 400-den astam turǵyn 10 túrli mamandyqty ıgergen. Olardyń arasynda temir jáne aǵash ustasy, santehnık, elektrık, tiginshi syndy suranysqa ıe mamandar bar. Jańa kásip ıelerine kýálikter saltanatty túrde tapsyryldy.
Sondaı-aq, aýdanda túlekterge arnalyp jármeńke uıymdastyryldy. Oǵan 60-tan astam jumys berýshi qatysyp, 250-ge jýyq jumys orny usynylǵan. Aıta ketetini, atalǵan baǵdarlama aıasynda aýdannan 1500-den astam adam qysqa merzimdi oqý kýrsyna joldanypty. Olar «Ár aýylǵa óz sheberi» jobasy aıasynda aýdanǵa qajetti degen 38 mamandyqty ıgergen.
Budan bólek, Ońtústik Qazaqstan oblysynda arnaıy baǵdarlama aıasynda 12 myńnan astam adam qysqa merzimdi oqytý kýrstaryna joldanyp, búginde onyń 9 myńǵa jýyǵy mamandyq ıesi atanǵan. Oblystyq jumyspen qamtýdy úılestirý jáne áleýmettik baǵdarlamalar basqarmasynyń málimdeýinshe, búgingi tańda eńbek naryǵyna asa qajetti degen 85 mamandyq boıynsha arnaıy bilim alǵan kásip ıeleri jumyspen qamtylyp otyr.