Búgingi zamandaǵy stýdentter mekenjaıy qandaı bolýy kerek? Onyń úlgisi men etalonyn Q.Jubanov atyndaǵy Aqtóbe óńirlik memlekettik ýnıversıtetiniń rektoraty qoǵamdyq ómirge kiriktirdi. Soǵan saı munda 500 adamǵa arnalǵan toǵyz qabatty jastar men stýdentter úıi boı kóterdi.
Onyń ádettegi jataqhanalardan ózgesheligi qandaı? Estigenniń jalǵany bolar, kórgenińdi aıt demeı me dana halqymyz. Osy halyqtyq qaǵıdaǵa saı kórgenimizdi aıtar bolsaq, «aqyldy úı» atanyp úlgergen ǵımarattyń artyqshylyǵyna eshteńe teń kelmeıdi dese de bolady. Oǵan tirkeý elektrondyq nusqa boıynsha ashyq, móldir jáne jarııaly túrde júrgiziledi. Munda áleýmettik ádilettilik talaptary tolyqtaı saqtalǵan. Sondyqtan da jastar men stýdentter úıiniń tuńǵysh turǵyndary –turmysy tómen, tabysy az ári tolyq emes otbasylardyń balalary, oqý ozattary, sondaı –aq ózge óńirlerden kelip, oqyp júrgen stýdentter bolyp otyr. Ǵımarat pen bólmelerge kirý tártibi tolyqtaı avtomattandyrylǵan. Dálizderge beınekameralar qoıylǵan. Syrttan kirgender bólmedegi turǵyndaryń bas-joǵyn anyqtap, qajetti jaǵdaıda elektrondyq tablo arqyly tómende turyp-aq baılanysqa shyǵa alady. Smarthoým úlgisindegi jastar úıi eń sońǵy ınnovasııalyq tehnologııa jetistikterimen, ınternet júıesimen, sonyń ishinde smart oqý zalymen tolyqtaı qamtylǵan. Stýdentter seksııalyq úlgige sáıkes bir bólmede eki jáne úsh adamnan turady.
Joǵary oqý orny janyndaǵy sıfrlyq-tehnologııalar ortalyǵynyń dırektory Talǵat Júnisqalıev bizge taıaýdaǵy ýaqytta munda ózdiginen jınalyp jabylatyn, qajet kezinde bir demde stol men oryndyq bola qalatyn keremet kerýetter de paıda bolatynyn aıtyp berdi. Al úı shańyraǵynyń tóbesine kún batareıalary qondyrylmaq. Stýdentter úıindegi yńǵaıly as úı, demalys bólmeleri men májilis, jattyǵý zaldary jáne medısınalyq qosyn onyń jan-jaqtylyǵy men ámbebaptyǵyn aıǵaqtaı túsedi.
Oblys ortalyǵynda el óńirleri arasynda eshqandaı balamasy joq ǵımarattyń turǵyzylýy atalǵan ýnıversıtet stýdentteriniń jataqhanamen qamtylý deńgeıin buǵan deıingi 56 paıyzdan 80 paıyzǵa deıin kóterýge múmkindik týǵyzypty. Budan bólek taǵy da 500 oryndyq jataqhana kúrdeli jóndeýden ótkizilýde. Bul ǵımarat kelesi jyly paıdalanýǵa berilmek. Sol kezde stýdentterimizdi jataqhanamen tolyqtaı qamtı alamyz,- dedi gazet tilshisine ýnıversıtet rektory Baýyrjan Erdembekov.
Stýdent-jastarǵa arnalǵan «aqyldy úı» Q.Jubanov atyndaǵy Aqtóbe óńirlik memlekettik ýnıversıtetiniń óz qarajatyna turǵyzylǵan. Onyń quny 1 mıllıard teńgeni quraıdy.
Temir Qusaıyn
"Egemen Qazaqstan"