1991 jyly 1 jeltoqsanda elimizde ótken alǵashqy prezıdenttik saılaýda Nursultan Ábishuly Nazarbaev biraýyzdan Qazaqstan Respýblıkasynyń Prezıdenti bolyp saılanǵan jeńis saltanatynda halyq aqyny Shákir Ábenovtiń Elbasyna el atynan bergen batasyn tarıhymyz umytpaıdy.
El tilegi oryndaldy. Prezıdent osy jolda baryn saldy. 1991 jyldyń 17 jeltoqsanynda, ıaǵnı Táýelsizdiktiń alǵashqy kúninde óz sózinde bylaı dedi: «Keń-baıtaq jerimizdiń baılyǵy osy dalanyń túpkilikti halqyna da, taǵdyr qosyp birge ómir súrip jatqan ózge ult ókilderine de molynan jetedi. Ne istesek te aqylmen isteıik, arzan uranǵa ermeıik, ushpa sezimge erik bermeıik degim keledi. Ásirese jastar salqynqandylyqtan, úlkendi syılaýdan, sózge toqtaýdan aınymasa, qashanda dostyqqa adal bolsa, baýyrmashyl, keńpeıil bolsa, halyqtyń atyna sóz keltiretin ustamsyzdyq ataýlydan aýlaq júrse dep tileıik». Elbasynyń osy úndeýi arqyly Qazaqstan saıası turaqtylyqqa, tynysh ómirge qol jetkizgenin jastar bilýi kerek. Búginde elimiz álemge adamzat múddesi úshin ustamdylyq tanytyp, beıbitshilikke qoldaý bildirýde erikti túrde úlgi bolyp otyr.
Táýelsiz halqynyń beıbit, tynysh ári qolaıly ómir súrý jaǵdaıyn jasaǵan tulǵa ǵana tarıhta erekshe atalady. Semeı ıadrolyq polıgonynyń jabylýy, Shyǵystaǵy Qytaı men Batystaǵy Reseımen aradaǵy shekara máselesiniń sheshimi tabylyp, onyń kartasynyń BUU-ǵa tapsyrylýy, jańa elorda Astananyń boı kóterýi, Álemdik jáne dástúrli dinder kóshbasshylarynyń Astanada ótken úsh quryltaıy, áıgili EKSPO-17 halyqaralyq kórmesiniń Astanada tabysty ótýi, Qazaqstan halqy Assambleıasynyń kelisim men tynyshtyq saqtaý qyzmeti sııaqty teńdessiz tarıhı tabystardy urpaqtan-urpaqqa jetkizý úshin Táýelsizdik kúni sııaqty memlekettik merekeniń jalpyhalyqtyq sıpatta ótetini asa mańyzdy jeńisimiz degim keledi.
Aıagúl MIRAZOVA, Qazaqstannyń Eńbek Eri