Dostyq úıinde ótken «Beıbitshilik, birlik, kelisim-rýhanı jańǵyrýdyń negizi» atty forýmda oblys ákiminiń orynbasary Madııar Qojahmet, oblystyq assambleıanyń hatshylyq meńgerýshisi Naıl Salımov «Rýhanı jańǵyrý» baǵdarlamasy aıasynda júzege asyrylǵan sharalarmen qatar aldaǵy mindetterdi de ortaǵa saldy.
Búgingi kúni óńirde turaqty túrde jumys isteıtin 203 etnomádenı birlestik quramyna 2 myńdaı adam tartylǵan. 2500-deı túrli is-shara ótkizilip, 250 myń adam qamtylǵan. Medıasııa kabınetteri 30 paıyzǵa ulǵaıyp, 97-ge jetken. «Qamqor», «Jaqsylyq jasa», «Belyı svetok», «Qoǵamdyq bastama», «Qaıyrymdylyq kesh» konkýrs-aksııalar sheńberinde 1500 is-shara uıymdastyrylyp, turmysy tómen otbasylarǵa, az qamtylǵan adamdarǵa, múgedek jandarǵa 157 mıllın teńgeniń kómegi berilgen. Qoǵamdyq kelisim keńesterine eki júz adam áleýmettik máseleler boıynsha qaırylǵan.
Saltanatty shara barysynda oblystyq assambleıamen qoıan-qoltyq jumys istep júrgen bir top belsendi múshege Qazaqstan halqy Assambleıasynyń jáne oblys ákiminiń Qurmet gramotalary tabys etildi. Olardyń arasynda «Túrik mádenıeti» qoǵamdyq uıymy tóraǵasynyń orynbasary Dılıara Hasanova , Analar keńesiniń tóraıymy Kúlimkóz Smaıylova, Ǵ. Músirepov aýdany qoǵamdyq keńes tóraıymy Baqyt Jantasova, taǵy basqalary bar.
Assambleıanyń bastamasymen uıymdastyrylǵan «Myń bala» respýblıkalyq mádenı-aǵartýshylyq jobasynyń «Til mektebi» avtorlyq kýrstar baǵdarlamasynyń jeńimpazy bolyp qazaq tili men ádebıeti pánderiniń muǵalimi Rahat Ázimbaeva tanylsa, № 17 mekteptiń oqýshysy Abbas Dýrsýnov Alashordanyń 100 jyldyǵyna arnalǵan «Kemel eldiń kemeńger qalamgerleri» esse men óleńder baıqaýynda top jardy. «Shańyraq» aımaqtyq baıqaýynda birlik pen kelisim taqyrybyna qalam terbegen Araılym Beısenbaeva, Tatıana Dell, Sálıma Bazarbekova, Indıra Qalıeva sııaqty jýrnalıster úzdik atandy.
M. Qozybaev atyndaǵy Soltústik Qazaqstan memlekettik ýnıversıtetiniń oqytýshysy Iýlııa Kýzmenko ǵylymı jobalar saıysynda «Jastardy patrıotızmge tárbıeleýdegi etnografııalyq týrızmdi paıdalaný múmkindigi» taqyrybymen erekshelendi. «Balqadısha», «Alýa», «Qýanamyn», «Zvonısa», «Lıaısan» halyqtyq bı, án toptaryna da erekshe qurmet kórsetildi.
«Qazaqstandaǵy 100 jańa esim» jobasy boıynsh úzdik dep tanylǵan 8 jerlesimiz ortaǵa shaqyrylyp, úlken qoshemetpen qarsy alyndy.
О́mir Esqalı,
«Egemen Qazaqstan».
Soltústik Qazaqstan oblysy.