Táýelsizdik kúnine oraı Astanadaǵy Elbasy kitaphanasynda Memleket basshysy Nursultan Nazarbaevtyń «Táýelsizdik dáýiri» atty jańa kitabynyń saltanatty tusaýkeser rásimi ótýde. Prezentasııany júrgizgen «Nur Otan» partııasy tóraǵasynyń birinshi orynbasary Muhtar Qul-Muhammed jańa kitapty Prezıdent óz qolymen jazǵan táýelsizdik ensıklopedııasy dep baǵalady.
Elimizdiń eń ulyq merekesi – táýelsizdik merekesimen quttyqtaǵan «Nur Otan» partııasy tóraǵasynyń birinshi orynbasary Muhtar Qul-Muhammed jańa kitapqa erekshe baǵasyn berdi.
«Táýelsizdik dáýiri» – Elbasynyń júrek tórinde saqtaǵan, tumadaı tundyrylǵan tunyq syrlary, oı tolǵanymdary toptastyrylǵan kitap. Onda 30 jyldyq keıingi tarıhymyz qamtylǵan. Jańa kitap – Qazaqstan Respýblıkasynyń negizin qalaǵan Tuńǵysh Prezıdentimizdiń óz qolymen jazylǵan táýelsizdik ensıklopedııasy», dedi Muhtar Qul-Muhammed.
Qazaqstannyń búginde irgesi berik, yntymaǵy jarasqan, ekonomıkasy qýatty, saıası júıesi saralanǵan, óz jolyn, óz bolashaǵyn aıqyndaǵan, álemdik qaýymdastyq aldyndaǵy bedeli bıik, úsh birdeı jańǵyrýdy oıdaǵydaı ótkize bilgen abyroıly memleket ekenin aıtqan partııa tóraǵasynyń birinshi orynbasary táýelsizdik zamany Qazaqstan úshin ǵasyrlar júgin arqalaǵan ǵalamat dáýir ekenin aıtty.
«Aldaryńyzdaǵy kitap – Elbasynyń bárimiz úshin eń qasıetti qundylyq sanalatyn táýelsizdik týraly oı-tolǵamdarynyń jıyntyǵy. Endeshe bul kóp uzamaı-aq barsha qazaqstandyqtardyń súıip oqıtyn kitabyna aınalaryna kámil senemin», dedi M.Qul-Muhammed.
Tarıhı pýblısıstıka janrynda jazylǵan, qazaq jáne orys tilderinde basylǵan kitapta egemen memlekettiń negizi qalanǵan kúnnen bastap onyń qalyptasý kezeńderiniń erekshelikteri men táýelsizdik dáýirindegi ishki jáne syrtqy syn-qaterlerdi eńserýge baılanysty qabyldanǵan sheshimderdiń mán-mazmuny men tetikteri egjeı-tegjeıli baıandalady.
Kitaptyń tusaýkeser rásimine Parlament depýtattary, qoǵam qaıratkerleri, «Nur Otan» partııasynyń basshylyǵy men músheleri, ǵylym, zııaly qaýym, aqparat quraldary jáne jastar uıymdarynyń ókilderi, sarapshylar men stýdentter qatysty.
Maıgúl SULTAN, «Egemen Qazaqstan»