Táýelsizdik kúni qarsańynda Qazaqstan Respýblıkasynyń Tuńǵysh Prezıdenti – Elbasy kitaphanasynda Memleket basshysy Nursultan Nazarbaevtyń «Táýelsizdik dáýiri» atty jańa kitabynyń saltanatty tusaýkeser rásimi ótti.
Saltanatty sharada sóz sóılegen Premer-Mınıstr Keńsesi Basshysynyń orynbasary, saıasattanýshy Erjan Babaqumarov búgin óte mańyzdy kitapty tusaýy kesilgenin atap ótti. «Meniń oıymsha, bul jaı ǵana kitap emes, bul - Qazaqstan Prezıdenti Nursultan Nazarbaevtyń ótkenge jáne bolashaqqa kózqarasy. Kitapta osy jyldar aralyǵynda bolǵan oqıǵalar saralanǵan. Sonymen qatar munda tek faktiler ǵana emes, talqylaý da, tereń paıym da, bolashaqqa jasalǵan boljamdar da bar. Men kitaptyń qundylyǵy barlyǵymyz úshin aıqyn kórinip tur dep oılaımyn. Sebebi kitaptyń avtory - Prezıdent Nursultan Nazarbaev oqıǵalardyń kýágeri, qatysýshysy ǵana emes. Ony táýelsiz memleketimizdiń tarıhyn jasaýshy deýge de bolady. Sondyqtan bul kitap qajettiligin joǵaltpaıtyn tutas bir dáýirdiń mańyzdy qujaty ispetti», dedi Erjan Babaqumarov. Onyń aıtýynsha, kitaptyń basty ereksheligi - Nursultan Nazarbaev táýelsiz Qazaqstannyń irgesin kóterý kezeńin álemdik oqıǵalarmen qatar órbigenin áserli kórsetken. «Qazaqstan táýelsizdik alǵan kezeńde álemde de túrli ózgerister bolyp jatty. Qazaqstandaǵy oqıǵalar álemdegi iri ózgerister kezeńine tuspa-tus keldi», - deı kele Premer-mınıstr keńsesi basshysynyń orynbasary toqsanynshy jyldary ekonomıka, saıasat, áleýmettik salada zor ózgerister bolǵanyn aıtty.
«Biz totalıtarlyq júıeni ysyrdyq. Naryqtyq ekonomıkaǵa óttik. «Táýelsizdik dáýiri» kitabynda Prezıdent Nursultan Nazarbaev memleket tarıhyndaǵy jańǵyrrý kezeńderin kórsetken. Mysaly, 1990 jyldary ekonomıkada, saıasatta, áleýmettik salalarda úshtik tranzıt kezeńi bolǵany belgili. Dál osy kezeńde biz naryqtyq ekonomıkaǵa kóshtik. Ekinshi jańǵyrý kezeńi 1990-2010 jyldar aralyǵynda boldy. Bul kezderi ekonomıka jyldam damydy. Jańa astana salyndy. Eń bastysy, Qazaqstan-2030 strategııasyn oryndap, básekege qabiletti 50 memlekettiń qatarynan kórindik», deı kele Erjan Babaqumarov Qazaqstannyń álemde bolǵan eki daǵdarystan aman shyqqany memleket retinde tolyq qalyptasyp úlgergenimizdiń aıǵaǵy ekenin aıtty.
«Prezıdent kitapta bizdiń qoǵam úshin eń kúrdeli bolǵan kezeńder týraly taldap jazǵan. Sonymen qatar Qazaqstan-2050 strategııasynda jańa maqsattar qoıylǵanyn, memleketimizdiń álemdegi úzdik TOP-30 qataryna kirýge talpynys jasaǵanyn atap ótken. 2014-2016 jyldary álemde geosaıasat, geoekonomıka, jańa tehnologııalarǵa qatysty álemde óte kúrdeli prosester bastalǵany belgili. Sol kezeńde Qazaqstanda «Nurly jol» baǵdarlamasy men 5 ınstıtýsıonaldy reforma qabyldandy. Nebary úsh jyldyń ishinde memleket jańa jahandyq ahýaldarǵa beıimdelip kett. 2016 jyldyń sońynda ekonomıkalyq ósimdi qaıta qalpyna keltirdii», dedi Erjan Babaqumarov. Onyń aıtýynsha, Prezıdent kitapta qabyldanǵan sheshimderdiń ishki logıkasyn kórsete otyryp, sol arqyly qıyndyqtardy qalaı eńsergenin kórsetken.
«Dinı, ulttyq mádenı, til, ult bolashaǵyna qatysty eń ózekti suraqtarǵa kelgende kúrdeli máseleler sheshimin tapty. Reseı-Túrkııa qarym-qatynasyn retteýdiń mán-jaıy belgili boldy. Men úshin «Táýelsizdik dáýiri» bul tek ótken jyldar týraly kitap qana emes, bizdiń eldiń damý jolynyń bolashaqta qandaı qaǵıdattarǵa súıený kerektigin kórsetetin týyndy. Kitapta Nursultan Nazarbaev memleketti basqarý, strategııalyq josparlaý tájirıbesi kórinip tur», - dedi Erjan Babaqumarov. Ol sózin qorytyndylaı kele Abylaı hannyń úsh armany bolǵanyn esine aldy. «Abylaı han qazaqtardyń álemniń tórt túkpirimen beıbitshilikte ómir súrgenin, halyqtyń otyryqshy ómir saltyna kóshkenin, úsh júzdiń basy qosylǵanyn qalapty. Qazir osy úsh armanǵa da qolymyz jetti. Meniń oıymsha, Prezıdenttiń bul týyndysy halyq armanynyń oryndalǵany týraly kitap», dedi ol.
Gúlnur Qýanyshbekqyzy,
«Egemen Qazaqstan»