Búgin Táýelsizdik kúni qarsańynda Elbasy kitaphanasynda ótken Memleket basshysy Nursultan Nazarbaevtyń «Táýelsizdik dáýiri» atty jańa kitabynyń saltanatty tusaýkeser rásiminde sóz alǵan L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov Elbasy eńbegin oqý quraly retinde bilim júıesinde keńinen paıdalaný qajet degen usynysyn aıtty, dep habarlaıdy egemen.kz.
«Kópten kútken kitapqa búgin qol jetti. Bul eńbek osy otyrǵan árqaısymyzdyń taǵdyrymyz týraly. Elimizdiń shırek ǵasyrdaǵy bary men nary týraly, eńbegimiz ben erligimiz týraly, jarqyn isterimiz týraly kitap. Bul Elbasynyń elge syıy, eldiktiń baıandy baǵyna, baǵanaly ordasyna syıy», degen ýnıversıtet rektory tusaýkeser rásiminiń Táýelsizdik kúniniń qarsańynda, Tuńǵysh Prezıdent – Elbasy kitaphanasynda ótýiniń rámizdik, sımvoldyq máni bar ekenin atap ótti.
Táýelsizdik tujyrymdamasy bolǵan bul kitapty barsha qazaqstandyq kórip, oı túıýi kerek dep biletin Erlan Báttashuly jańa eńbekti boıaýy keppeı turyp oqyǵanyna qýanyshty ekenin aıtty.
«Bul kitap – Qazaqstan jolynyń aınasy, kúndeligi, shejiresi. Tujyrymdamaly, irgeli eńbek. Biz tarıhshylar júrip ótken táýelsizdik jyldardaǵy shırek ǵasyrymyzdy baıyptaıtyn jáne shynaıy baǵa beretin óreli eńbekti kútip júrgenbiz. Ony Elbasymyzdyń jazýy elimiz úshin de, eldigimiz úshin de úlken oqıǵa dep bilemin. Nursultan Nazarbaev jaı el basshysy emes. Qurýshy, jasampaz, kóregen prezıdent. Endeshe bul eńbek jańa memleketti óz qolymen, óz bastamasymen turǵyzǵan asa iri tarıhı tulǵanyń ári jylnamasy, ári dáýirnamasy», dedi E.Sydyqov.
Sondaı-aq, ol memleket qurýdyń jón-josyǵyn da, teorııa, praktıkasyn da ǵylymı órede meńgergen Nursultan Ábishulynyń el tarıhyn jazýǵa tolyq moraldyq quqy bar ekenin aıta kelip kitap tóńireginde birqatar usynystaryn ortaǵa saldy.
«Eń aldymen, bul eńbekti oqý quraly retinde bilim júıesinde keńinen paıdalaný qajet. Ekinshiden, kitaptaǵy tujyrymdamalar, oılar men mańyzdy faktiler boıynsha túrli mádenı-tanymdyq sharalar keshenin uıymdastyrǵanymyz durys. Úshinshiden, el tarıhyn, onyń deńgeıin tanytatyn jańa eńbekti kóp keshiktirmeı Birikken ulttar uıymynyń tilderine aýdaryp bastyrtyp, álemge taratqanymyz jón. Sondaı-aq, tehnologııa dáýirinde Elbasy eńbegin sıfrly júıege túsirip, túrli formatta nasıhattaý tıis», dedi ol.
Aıta keteıik, jańa týyndyda egemen eldiń negizi qalanǵan kúnnen bastap onyń qalyptasý kezeńderiniń erekshelikteri men 26 jyldyq táýelsizdik dáýirindegi ishki jáne syrtqy syn-qaterlerdi eńserýge baılanysty qabyldanǵan sheshimderdiń mán-mazmuny men tetikteri egjeı-tegjeıli baıandalǵan. Tusaýkeser rásimine Parlament depýtattary, qoǵam qaıratkerleri, «Nur Otan» partııasynyń basshylyǵy men músheleri, ǵylym, zııaly qaýym, aqparat quraldary jáne jastar uıymdarynyń ókilderi, sarapshylar men stýdentter qatysty.
Maıgúl SULTAN,
«Egemen Qazaqstan»