Mańǵystaýda Táýelsizdik kúni qarsańynda Qazaqstan-Túrikmenstan shekara shebinde QR UQK ShQ Jaǵalaý kúzeti óńirlik basqarmasy 2018 áskerı bóliminiń «Bolashaq» shekara beketi saltanatty túrde ashyldy.
2018 áskerı bóliminiń jeke quramy Qazaqstan Respýblıkasynyń tranzıttik aımaǵy bolyp tabylatyn Qazaqstan-Túrkmenstan baǵytyndaǵy Memlekettik shekarany senimmen kúzetip keledi. Osyǵan deıin shekara zastavasynyń kúndelikti qyzmettik – jaýyngerlik is-áreketteri jyljymaly modýl tıpterinde uıymdastyrylyp kelgen bolatyn. Endi áskerı quram jańa bekette Otan aldyndaǵy paryzyn oryndaı alady.
Ashylý saltanatyna arnaıy barǵan oblystyq máslıhat hatshysy Serikbaı Trumov Qazaqstan shekarashylarynyń halyq pen eldiń múddesine rııasyz qyzmet etetindigine, áskerı antqa jáne qyzmettik paryzǵa adal bolatyndyǵyna senim bildirdi.
Qazaqstan Respýblıkasy Ulttyq qaýipsizdik komıteti Shekara qyzmetiniń shekarashylary Memlekettik shekaranyń qol suǵylmaýyn, shekara keńistigindegi zańdylyqty jáne tıisti tártipti ornatýdy oryndaýmen, Qazaqstan Respýblıkasynyń Memlekettik shekarasyn senimdi qorǵaý tapsyrmasyn asqan erlikpen atqaryp keledi.
7 jyly QR UQK ShQ Jaǵalaý kúzeti óńirlik basqarmasy áskerıleriniń kómegimen memlekettik shekarany zańsyz buzǵan 10-nan astam adam ustalyp, olarǵa 2 100 000 tenge aıyppul salynsa,
60-tan astam júzý qaıyqtary ustalǵan. Sondaı-aq, 2000-nan asa bekire balyǵy men 1500-den astam túrli balyqtar tárkilengen jáne 800 myń metrden astam tor alynyp tastalǵan. Jalpy, 24 qylmystyq jáne 989 ákimshilik is qozǵalǵan.
Sharaǵa qatysýshylar shekara qalashyǵynyń ınfraqurylymymen, sondaı-aq avtokólik jáne arnaıy tehnıkasymen tanysty.
Gúlaıym ShYNTEMIRQYZY, «Egemen Qazaqstan»
Mańǵystaý oblysy