«Armandar oryndalady» qaıyrymdylyq aksııasy jetim jáne ata-ananyń qamqorlyǵynsyz qalǵan balalardy áleýmettik jaǵynan qoldaýdy kózdeıdi.
Qaıyrymdylyq sharaǵa oblystyq máslıhattyń depýtattary, memlekettik uıymdar, kásiporyndar, jeke adamdar qyzý ún qosty. Kózderi jaýtańdaǵan balalardyń qalaǵan syılyqtaryn alyp beremiz degen taýdaı ýádelerin oryndaýǵa qazirdiń ózinde belsene kirisip ketken.
«Balǵyndar– bizdiń bolashaǵymyz. Árbir azamat múmkindiginshe muqtajdarǵa qol ushyn bergeni jón. Odan eshkim kedeılenip qalmaıdy. «Jetim kórseń jebeı júr» degen támsildi ata-babalarymyz bizge ósıet etip qaldyrǵan», deıdi evreı mádenı ortalyǵynyń tóraǵasy, oblystyq máslıhattyń depýtaty Rashbıl Evdaev.
Qaıyrymdylyq aksııasyn alǵashqylardyń qatarynda «Intergo» kompanııasy da qýattady. 10 jyldyq tarıhy bar seriktestik osy tektes sharalarǵa únemi qatysyp keledi. Byltyr Sokolov arnaıy mektep-ınternatynyń oqýshylaryna sport jabdyqtary men túrli syılyqtar tartý etipti. Bıyl osy úrdisti jalǵastyrmaqshy.
Oblystyq jastar resýrstyq ortalyǵy 60 uıymǵa hat joldaǵan. Olardyń arasynda qaıyrymdylyq aksııasyna qatysýǵa nıet bildirgender az emes.
«Syılyqtar men tartý-taralǵylardy Petropavl sábıler úıi men Sokolov arnaıy mektep-ınternatynyń tárbıelenýshilerine tapsyramyz. «Armandar oryndalady» qaıyrymdylyq aksııasy jańa jylǵa deıin jalǵasady», deıdi jastar resýrsy ortalyǵynyń bas mamany Roksana Orynbasarova.
О́mir Esqalı,
«Egemen Qazaqstan».
Soltústik Qazaqstan oblysy