Bıyl jańajyldyq bas shyrshany Astana qalasynyń ákimi Áset Isekeshev jaqty, dep habarlaıdy elorda ákimdiginiń medıa ortalyǵy.
Alda kele jatqan merekeniń eń negizgi atrıbýtynyń biri "EKSPO" kórmesiniń aýmaǵynda Nur Álem sferasynyń mańaıyna ornatyldy.
"Bıyl Astanada ornatylǵan jańa jyldyq shyrshany 200 myń jarqyraǵan gırlıandııa men 6000 shar jáne de ártúrli janyp-sónip turatyn áshekeılermen sándeldi. Shyrshanyń uzyndyǵy 25 metrdi quraıdy" - deıdi Astana qalasynyń mádenıet, muraǵat jáne qujattama basqarmasy basshysynyń orynbasary Narıma Muhambetalına.
Astana qalasynyń turǵyny men qonaqtary úshin qazaqstandyq estrada juldyzdarynyń qatysýymen konserttik baǵdarlama uıymdastyryldy, al balalarǵa arnap súıikti keıipkerleriniń beınesinde anımatorlar shyqty. Shyrshany tutandyrý rásimine kelýshiler merekelik feıerverkke kýá boldy.
"Osyndaı kezekti ret astananyń bas shyrshasyn jaǵatyn ádemi sımvolıkalyq is-sharasyn bári jaqsy kóredi, barshamyz osy merekeni úlken qýanyshpen kútemiz. Munda kelgen balalardyń da, úlkenderdiń de, qonaqtardyń da kóńil-kúıi keremet", - deıdi N.Muhambetalına.
Bas shyrshany jaǵýmen qatar EKSPO-2017 kórmesiniń aýmaǵynda ornalasqan iri muz qalashyqtyń da ashylýy bolyp ótti.
Munda eresekter úshin bıiktigi 5 metr jáne uzyndyǵy 40 metr syrǵanaq pen balalar úshin eki syrǵanaq boı kóterdi, balalar syrǵanaǵy sáıkesinshe - 2,5 jáne 14 metr. Al qalashyqtyń taqyryby "EKSPO-2017" Bolashaqtyń energııasy" dep ataldy, sondyqtan Londonnyń Gaıd-parkinde 1851 jyly ashylǵan birinshi EKSPO kórmesi men 1889 jylǵy kórmedegi kire beris qaqpa - Eıfel munarasynyń muz kóshirmesi qoıyldy.
Balalardy ásirese bıiktigi 6 metr ataqty Dısneı Lend saraıynyń kóshirmesi qyzyqtyrdy. Mınona, tanymal komık qaharmandary, Makýın naızaǵaıy, úsh metr Aıaz ata men Qarsha qyzdyń muz beınesi kompozısııalardyń sánin asha tústi. Bulardyń bári de túrli-tústi muzdan jasaldy.
Sonymen qatar, qonaqtar úshin muz qalashyqta bıiktigi jarty metrge jýyq 80 metrlik labırınt ashyldy. Qalashyq barlyq perımetri boıynsha fýtýrıstik stıldegi arhıtektýralyq formada ornatyldy.