Qyzylorda oblysynda jobalyq menedjment júıesin eńgizý aıasynda oblys ákimdigi Hack Day baıqaýyn uıymdastyrdy. Eki kún ishinde baıqaýǵa qatysýshylar ınnovasııalyq jobalar boıynsha ıdeıalaryn tanystyrdy.
412 qatysýshy 3 nomınasııa boıynsha 137 joba ıdeıalaryn usyndy: «Aqparattyq tehnologııalar» (logıkalyq oıyn qosymshalary, servıstik mobıldi qosymshalar), «Kontent jáne medıa», «Kıno jáne vıdeo» (mýltıplıkasııalyq 2D, 3D jobalar, jarnama rolıkteri jáne t.b.). Baıqaý sharttaryna sáıkes qatysýshy komandalar músheleri 3 mınýt ishinde joba prototıpterin tanystyryp, taǵy da 3 mınýt ishinde suraqtarǵa jaýap berýi tıis.
Uıymdastyrýshylardyń aıtýy boıynsha, HackDay baıqaýynyń basty mindeti – toppen jumys istep, 48 saǵat ishinde joba ıdeıasynan prototıp jasaqtap alý. Is-sharaǵa ınternet-joba ıdeıasy bar, biraq ony júzege asyrýǵa resýrstary jetkiliksiz kez kelgen adam qatysa alady. Bir ǵana talap – barynsha kreatıvti jaǵdaıda naqty jobalar boıynsha jumys isteýge daıyn bolý. Is-shara aımaǵymyzda bastaýshy jáne tájirıbeli programmıst, dızaıner, jobalaýshy, IT-marketolog, zańger, ssenarıı jazýshy, grımer jáne PR mamandary men ózge de IT salasyndaǵy qyzyqty joba ıdeıalary bar tulǵalardyń qoǵamdastyǵyn qurýǵa múmkindik beredi. Qoǵamdastyq startaptardy damytýdyń barlyq kezeńderinde týyndaǵan máselelerdi sheshýge kómektesýi tıis: ıdeıany óńdeý men prototıpten jobaǵa salynǵan ınvestıstısııalardy alýǵa deıin.
Qyzylorda oblysynyń ákimi Qyrymbek Kósherbaev jeńimpazdardy quttyqtady.
«Bizdiń jastar óte talantty, sondyqtan olardy qoldaý kerek. О́zderińiz biletindeı, biz Syrdarııanyń sol jaǵalaýynda jańa qala salýdamyz. Ol jerde jastardyń IT-parki ornalasatyn bolady. Osy salany jetik meńgergen 20 jasqa jumys orny ashylyp, olar joǵary jalaqy, turǵyn úımen qamtamasyz etilmek. Tatarstan Respýblıkasynyń Prezıdenti R.Mınnıhanovtyń oblysqa sapary kezinde Tatarstannyń IT-mamandary bizdiń jastardy oqytý týraly kelisimge keldik. О́ıtkeni Reseıdiń úzdik IT-mamandary Tatarstanda ornalasqan. Sonymen qatar, Máskeý memlekettik ýnıversıteti «Kıberqaýipsizdik», «Prosesterdi matematıkalyq modeldeý» mamandyqtary boıynsha jyl saıyn 20 qyzylordalyq stýdentke magıstratýrada oqý úshin granttar bóletin boldy. Munan bólek, biz «Maıkrosoft» kompanııasymen Qyzylorda qalasynda fılıalyn ashý týraly kelistik. Osylaısha, Qyzylordany aqparattyq tehnologııalardyń epısentrine aınaldyrǵymyz keledi», - dedi Q.Kósherbaev.
Jeńimpazdar ashyq daýys berý arqyly anyqtalyp, baǵaly syılyqtarmen marapattaldy.
«Kontent jáne medıa» seksııasynda durys tamaqtaný taqyrybyndaǵy saıt (3 oryn), qalalyq qoǵamdyq oryndarynyń 3D-úlgileri (2 oryn) jáne málimetterdi 3D-formatynda usyný jobalary úzdik dep tanyldy.
«Aqparattyq tehnologııalar» nomınasııasy boıynsha turǵyn úılerde qubyrdan gazdyń aǵyp ketýin anyqtaıtyn qural (3 oryn), «Aqyldy aýrýhana» (2 oryn) jáne «Aqyldy aıaldama» (1 oryn) qosymshalary júldeli oryn aldy.
«Kıno jáne vıdeo» nomınasııasy boıynsha úshinshi oryndy «Qyzylordada – megapolısten de artyq» beınerolıgi, ekinshi– jastar men jasóspirimderiniń ózin-ózi baǵalaý máseleleri boıynsha rolık alsa, birinshi orynǵa ómirde óz ornyn tabý jáne oǵan ózgelerdiń pikiri áser etýi týraly fılm ornalasty.
Odan bólek, ádil qazylar alqasynyń músheleri eń jas qatysýshy – 13 jastaǵy Beıbit Bekzattyń jáne qyzylordalyq eriktilerdiń ataýly kómek kórsetý jobalaryn yntalandyrý júldelermen marapattady.