Astana qalasynda «Qazposhtanyń» tuńǵysh sıfrly keńsesi ashyldy. Onyń tabaldyryǵyn attaǵan tutynýshylardy «Qýanysh» esimdi robot «Qazposhtanyń» sıfrlyq keńsesine qosh keldińiz» dep qarsy alady. Aldaǵy ýaqytta mundaı keńseler elimizdiń birneshe qalasynda iske qosylmaq. Elordadaǵy alǵashqy arnaıy mamansyz qyzmet kórsetý nysanyn Premer-Mınıstrdiń orynbasary Asqar Jumaǵalıev aralap, jańa tehnologııalarmen tanysty. «Qazposhta» basshysy Sáken Sársenov keńse jumysy jaıynda áńgimelep, elektrondy kommersııany qarqyndy damytyp jatqandaryn jetkizdi. «Bólimshelerdi jańartyp, kóptegen servısterimizdi onlaın úlgige kóshirýdemiz. Búginniń ózinde adamdarǵa mashınalar qyzmet kórsetetin bólimsheni ashyp, elimizdiń sıfrly saladaǵy bolashaǵyn qalyptastyrmaqpyz», dedi ol.
Iá, munda qyzmetterdi ádettegideı operator qyzmetkerler emes, gıbrıdti bankomattar, elektrondy kassır, poshtamat jáne VR-agent kórsetedi. «Qazposhtanyń» bolashaq keńselerinde klıentter poshtalyq jáne qarjylyq qyzmetterdi ózderi atqara alady. Sondaı-aq munda «post.kz» saıty qyzmetteriniń barlyq túrin paıdalanýǵa bolady. Aıtalyq, aqsha aýdarymdaryn jasaýǵa, kommýnaldyq tólemderdi, JQE buzǵany úshin aıyppuldardy tóleýge, avıa jáne temir jol bıletterin satyp alýǵa jáne basqa da qyzmetterdi oryndaýǵa múmkindik bar.
Kásipkerler úshin zamanaýı keńse biregeı qyzmeti usynyp otyr. Naqtyraq aıtqanda, bank pen ınkassator qyzmetin almastyra alatyn elektrondy kassırdiń qundylyǵy erekshe. Bólimshege kelip, óz kartańyzdy toltyrsańyz jetkilikti. Jabdyq bir mezette 100 mln teńgege deıin qabyldaıdy. Aqshany júıeniń ózi sanap, kýpıýralar boıynsha irikteıdi. Operasııa sońynda klıentke túbirtek beriledi. Qolma-qol aqsha berýde de elektrondy kassır dál osylaı jumys isteıdi. Keshen 4-5 aı avtonomdy tártipte jumys isteı beredi. Bankter 18:00-ge deıin qyzmet kórsetse, sıfrly keńse saǵat 22:00-ge deıin ashyq bolady.
Bólimsheniń jumysyn tolyqtaı almastyra alatyn taǵy bir biregeı qurylǵy – gıbrıdti bankomat. Ol tólem kartasyna tapsyrys berýge jáne alýǵa kómektesedi, aldaǵy ýaqytta saýsaq pen bet-álpet boıynsha bıometrıkalyq verıfıkasııalaý qosylǵannan keıin karta shotynan kartanyń ózinsiz qolma-qol aqsha alýǵa múmkindik týady. Gıbrıdti bankomatta da «rost.kz» saıtyndaǵy kommýnaldyq tólemder, salyqtardy, nesıelerdi, JQE buzǵany úshin aıyppuldardy tóleý, aqsha aýdarymdary jáne depozıtterdi toltyrý sııaqty qyzmetter qoljetimdi. Sondaı-aq baılanys ortalyǵy operatorymen habarlasýǵa jáne naqty ýaqyt rejiminde keńes alýǵa bolady.
Sonymen qatar sıfrly keńsede klassıkalyq bankomattar men tólem termınaldary qoıylǵan. Olar aıyppuldardy tóleýge jáne shetelge shyǵýǵa qoıylǵan shekteýdi alyp tastaýǵa múmkindik beredi. Klıentter JSN engizý arqyly óz moınynda bereshektiń bar-joǵyn tekserip, tólem jasaýyna bolady. Bar bolǵany bes mınýt ishinde klıenttiń bereshegin tólegeni týraly aqparat Ádilet mınıstrliginiń derekter bazasyna túsedi de, 30 mınýtta elden tysqary shyǵýǵa salynǵan shekteý alynyp tastalady. Mundaı termınaldar elimizdiń 8 áýejaıynda ornatylǵan. Keler jyly qalalarǵa taǵy 120 termınal qoıylmaq.
«Sáýle» degen keńesshi «Method-Pro» mektebimen birge jasaldy. Ol bizdiń klıentterdiń mańyzdy suraqtaryna jaýap beredi. Máselen, tólemdi qalaı júrgizýge bolatynyn, bank kartasyn qalaı alýǵa bolatynyn «Sáýleden» surap bile alasyz. Ázirge «Sáýle» 100 suraqqa jaýap bere alady. Álbette, bul alǵashqy nusqa bolǵandyqtan, biz onyń qyzmet aıasyn keńeıtýdi qola alamyz», deıdi IT-sáýlet boıynsha departament dırektory Baqtııar Muhametqalıev. Ol «Qýanysh» atty robot ta osyndaı suraqtarǵa jaýap bere alatynyn atap ótti. «Qýanysh» kóbinese kelgen adamdardyń kóńilin kóterý úshin jumys isteıdi eken. Siz esimińizdi bir ret qana atasańyz bolǵany, ol esine saqtap, sizben áńgimelese beredi. Tipti erteńinde de sizdi tanyp, atyńyzdy atap, áńgime-dúken qurýǵa qabiletti. Ol aýa raıy týraly, qaıda turǵanyńyzdy aıtyp, «Wi-fi» paroliniń ózgergenin de jetkizedi.
Ashat RAIQUL, «Egemen Qazaqstan»