«Qazaqstan-2050» Strategııasynyń basty maqsattarynyń biri Qazaqstandy 30 eń damyǵan memleketter qataryna kirgizý ekeni belgili. Bul maqsatqa qol jetkizý úshin eńbek ónimdiligi men ekonomıkaǵa salynatyn ınvestısııa kólemin arttyrý kózdelgen. Ony júzege asyrý úshin «Samuryq-Qazyna» ulttyq ál-aýqat qory» AQ 2014 jyly Bıznesti transforamasııalaý baǵdarlamasyn qabyldaǵan bolatyn.
Bıznesti transformasııalaý baǵdarlamasyna «Samuryq-Qazyna» ál-aýqat qoryna qarasty Qazposhta, QTJ, Qazatomprom, KEGOC, QazMunaıGaz, Samuryq-Energo kompanııalary qatysýda. Baǵdarlama kompanııalardyń qunyn arttyrý, qurylymyn ózgertý, ınvestısııalyq qyzmetin jetildirý syndy baǵyttardy qamtıdy.
Úsh jyl buryn osy bastamaǵa qatysty forýmǵa Prezıdent Nursultan Nazarbaev ta qatysqan edi. Elbasy sol jıynda sóılegen sózinde: «Samuryq-Qazyna» qorynyń aldynda ulttyq masshtabtaǵy mindetter tur. Transformasııa aıasynda eń aldymen qor kompanııalary aksııalarynyń baǵasyn ósirýge baǵyttalǵan jumystardy atqarýy kerek. Ol úshin ónimdilikti arttyryp, tabysy kóp jáne tıimdiligi joǵary jobalarǵa ınvestısııa quıǵan mańyzdy», degen bolatyn. Mamandardyń aıtýynsha, baǵdarlama aıasynda atqarylatyn jumystar nátıjesinde Prezıdent aıtqan mindetter oryndalyp, «Samuryq-Qazyna» ál-aýqat qorynyń ónimdiligi 5 jylda 30-40 paıyzǵa artýǵa tıis.
Bıznesti transformasııalaý baǵdarlamasy qyzmet tıimdiligin arttyrý úshin qajetti jobalar jıyntyǵyn qarastyrady. Bıznestiń transformasııasy baǵdarlamasynyń negizgi baǵyttaryna prosesterdiń ashyqtyǵyn qamtamasyz etý, qyzmetkerlerdiń biliktiligin arttyrý, qyzmet prosesterin avtomattandyrý kiredi. Iаǵnı, «Adamdar – Tehnologııalar – Prosester» baǵyttary boıynsha ózgerister josparlanǵan. Sonymen qatar baǵdarlama aıasynda qyzmetkerlerdiń biliktiligin arttyrý kózdelgen. Biz baǵdarlamanyń qalaı júzege asyrylyp jatqanyn bilý úshin «Samuryq-Qazyna» ál-aýqat qoryna qarasty KEGOC kompanııasyna habarlasqan edik.
KEGOC – memleket úshin strategııalyq mańyzy bar aýqymdy ınvestısııalyq jobalardy júzege asyrýda mol tájirıbesi bar ınfraqurylymdyq kompanııa. Ol elektr jelilerin únemi jańǵyrtyp otyrady. Sonymen qatar búginge deıin kompanııa Eýropa qaıta qurý jáne damý banki, Dúnıejúzilik bank sekildi álemdik jetekshi qarjy ınstıtýttarynyń qatysýymen jalpy quny 1 mlrd AQSh dollarynan joǵary iri jobalardy júzege asyrǵan.
KEGOC Bıznesti transformasııalaý baǵdarlamasyna 2015 jyly kirgeni belgili. KEGOC-ta bıznesti transformasııalaý baǵdarlamasyn júzege asyrý 4 kezeńge bólingen. «Daıyndyq kezeńinde» qajetti resýrstar bólinip, arnaıy jumys toby qurylǵan. Negizgi qujattar bekitilip, keńesshiler jumyldyrylǵan, kompanııa mamandary oqý kýrstarynan ótken. Al «Dıagnostıka jáne dızaın» kezeńinde kompanııa qyzmetiniń tıimdiligin arttyrýǵa baǵyttalǵan bastamalar qolǵa alynyp, «Josparlaý» satysynda jobalar portfelinde kórsetilgen barlyq bastamalar toptastyrylǵan. Al sońǵy «Júzege asyrý» kezeńinde jobalar iske qosylady dep josparlanǵan. Búgingi kúni kompanııa tórt kezeńniń úsheýin júzege asyrǵan. «Bıznesti transformasııalaý baǵdarlamysnyń alǵashqy satylarynda biz barlyq bıznes prosesterge qaıtadan ınjınırıng júrgizip, jańa uıymdastyrý qurylymyn jasadyq. Sonyń nátıjesinde basqarýdyń birneshe satysy qysqardy. Mysaly, basqarma tóraǵasynyń orynbasary, departament basshysynyń orynbasary sekildi qyzmetter alynyp tastaldy. Fılıaldarda ekonomıkalyq máseleler boıynsha dırektordyń orynbasary, bas esepshiniń orynbasary laýazymy da qazir joq», deıdi kompanııanyń Basqarma tóraǵasy B.Qajıev. Onyń aıtýynsha, kompanııa qazirgi ýaqytta jeti iri jobany iske asyryp jatyr. Solardyń ishinde eń negizgisi «Kásiporyn prosesterin engizý» jobasy. Bul joba bıznesti basqarýǵa arnalǵan baǵdarlamamen qamtamasyz etetin aldyńǵy qatarly álemdik merdiger sanalatyn SAP kompanııasy sheshimderiniń negizinde iske asyryldy. Atalmysh kompanııa men «Samuryq-Qazyna» AQ arasynda jasalǵan kelisimshart boıynsha 5 jylda ekonomıkalyq nátıje 200 mlrd. teńgeni quraıdy dep boljanyp otyr. «Bul joba boıynsha materıaldyq qundylyqtardy, tehnıkalyq qyzmet kórsetý men basqarýdy jetildirýge bolady. Joba nátıjesinde operasııalyq jáne basqarý shyǵyndary men kommersııalyq shyǵyndardy azaıtyp, aınalym quraldaryn únemdeýge jol ashylady», deıdi kompanııa mamandary. Olardyń aıtýynsha, osy joba sheńberinde KEGOC-tyń barlyq bıznes-prosesteri biryńǵaı aqparattyq platformaǵa negizdeledi.
Bir aıta keterligi, joba kompanııa saıasaty men ádistemesi, bıznes prosesteri men aqparattyq júıe salalaryna negizdelgen. Bul joba negizinde birneshe júıeler qolǵa alynǵan. Mysaly, SAP ERP júıesi negizgi bıznes prosesterdi avtomattandyrýǵa múmkindik beredi. Sol arqyly kompanııa aktıvterin qoldaný tıimdiligin arttyrýǵa bolady. Al SAP Human Capital Management - adam kapıtalyn basqarý qyzmeti - mamandardy oqytý, biliktiligin arttyrý, menedjer men qyzmetkerlerge portal arqyly óz-ózine qyzmet kórsetýge múmkindik berýdi kózdeıdi. Sonymen qatar qyzmetkerlerge motıvasııa berip, birsaryndy jumysty azaıtýdy maqsat etedi. Joba aıasynda júzege asyrylatyn taǵy bir júıe – eńbek qaýipsizdigin basqarý (SAP EHS). Bul júıe jumysshylardyń jaraqat alýyn azaıtyp, qyzmetkerlerdiń baqylaý jumysyn avtomattandyrýǵa múmkindik beredi dep kútilýde. Mamandardyń aıtýynsha, avtomatty joba arqyly kimniń qandaı jerde jumys istep jatqanyn bilip, qaýipti jerde júrgenderdi arnaıy belgilep, olarǵa qosymsha jaǵdaı jasaýǵa múmkindik týady. Sonymen qatar ádisteme, bıznes-prosess jáne aqparattyq júıelerge negizdelgen aktıvterdi basqarý júıesi jetildiriledi.
Jalpy alǵanda baǵdarlamany iske asyrý kompanııanyń turaqtylyǵyn qamtamasyz etip, syrtqy jáne ishki ózgeristerge tez beıimdelýge, resýrstardy bıznestiń baǵyttaryna shoǵyrlandyrýǵa, eńbek ónimdiligin arttyrýǵa múmkindik bermek.
Gúlnur QÝANYShBEKQYZY,
«Egemen Qazaqstan»