Otyn tasyp, ot jaǵyp, kúl shyǵarý qaı aýyldyń turǵynyna da jeńil emes. Qarabalyq aýdanyndaǵy Voroshılov selosy aýdan ortalyǵyna jaqyn bolǵanymen, kómir, otyn túsirýdiń beıneti bolyp turatyn. Kómirdiń sapasy da ár jyly árqalaı bolady, baǵasy arzandamaıtyny taǵy bar.
Áý basta úlken aýyl bolǵanymen adamdar kóshe-kóshe, eldi meken de qýsyrylyp qalǵan. Qazir aýylda barlyǵy 455 adam turady, bastaýysh mektep pen klýb qana bar. Soǵan qaramastan aýyl «QazTransGaz» aksıonerlik qoǵamynyń «Qostanaı oblysynyń eldi mekenderin gazdandyrý jáne gaz taratý jelilerin jańǵyrtý» ınvestısııalyq jobasy aıasynda gazǵa qosyldy. Aýyl adamdarynyń kóńil kúıi de ózgerip sala berdi.
Natalıa Sosnovskaıa jasynan osy aýylda turyp keledi. Zeınetkerlikke shyqqansha bastaýysh mektep dırektory qyzmetin atqardy. Qazir aýyldyń ardagerler keńesine jetekshilik etedi, qoǵamdyq jumysqa da uıytqy, belsendi. Ot jaǵý, kómir túsirý, gaz ballonyn satyp alý, qosý sekildi jumystardyń barlyǵy da turǵyndarǵa qıyn ekenin biledi, ózi de sol jumystardyń barlyǵyn bastan ótkerdi. Kógildir gaz úıine kirgeli qoly uzaryp, onyń raqatyn kórip otyr.
– Biz buǵan deıin as ázirleý úshin kóbine elektr qýatyn, gaz ballonyn paıdalanyp keldik. Qysqy borandarda, kóktemde daýyl soqqan kúnderi elektr jaryǵy óship qalady, al gaz ballony dál qajet kezde taýsylyp qalady. Gaz ballonynyń qaýiptiligi óz aldyna áńgime. Ballonnyń gazy azaıǵan kezde ıisi shyǵyp, basymyzdy aýyrtatyn. Endi tabıǵı gaz qosylǵannan keıin bul qıyndyqtar artta qaldy dep esepteımin. Qazir úıimiz jyly, ómirdiń raqaty dep osyny aıt, – deıdi Natalıa Nıkolaevna.
Selony gazǵa qosý úshin 6,9 shaqyrymǵa tarta kóshearalyq gaz qubyrlary salyndy. Aýyldaǵy 155 jeke úıdiń 49-y gazǵa qosyldy, taǵy 4 úıdegi montaj jumystary tolyǵymen aıaqtaldy. Demek taǵy da 4 úı kógildir otynmen qamtylady degen sóz.
– Voroshılov sekildi halyq sany az aýyldardyń gazǵa qosylýynda úlken mán bar. Birinshi kezekte aýa tazarady, turǵyndar kómir tasyp, aǵash jarýdan qutylady. Demek adamdardyń ózge mańyzdy sharýalarǵa kóbirek ýaqyty bólinedi. «QazTransGaz» kompanııasy úlken jumys atqardy. Eki jylda oblysta 600 shaqyrym gaz qubyry salynady, 50 myńnan astam turǵyny bar 8 eldi mekenge gaz beriledi. Osynyń arqasynda oblysta kógildir otynnyń ıgiligin kórgen turǵyndar sany 10 paıyzǵa artady, – deıdi oblys ákiminiń birinshi orynbasary Ǵaýez Nurmaǵanbetov.
Elbasynyń tapsyrmasy boıynsha elimizdi gazdandyrýdyń bas jospary bekitilgen bolatyn. Sonymen qatar 2015 jyldyń qarasha aıynda Memleket basshysynyń óndiristik prosesterdi turaqtandyrý jónindegi tapsyrmasy aıasynda, óńirdiń turaqty ekonomıkalyq ósýin qamtamasyz etý, gazben jabdyqtaý jáne ekologııalyq ahýaldy jaqsartý, gaz qubyrlarynyń qalypty jaǵdaıda jumys isteýin qamtamasyz etý maqsatynda «QazMunaıGaz» ulttyq kompanııasy» AQ, «QazTransGaz» AQ jáne Qostanaı oblysy ákimdigi arasynda memorandýmǵa qol qoıyldy. Sol kelisimge sáıkes, ótken jyly 13,5 myńnan astam turǵyny bar Qashar jáne Oktıabr kentteri gazdandyryldy.
– Elbasy tapsyrmasyn júzege asyrý aıasynda «QazTransGazAımaq» ulttyq operatory bıyl Voroshılov selosynan keıin Qarabalyq aýdanyndaǵy Toǵyzaq, Denısov aýdanyndaǵy Alchanov, Antonov selolaryn da gazben qamtamasyz etedi. Ár úıdiń aldyna gaz qubyry kelip tur, – dedi «QazTransGaz Aımaq» AQ dırektorynyń orynbasary Muqan Sádýaqasov.
Búginde Qostanaı oblysy turǵyndarynyń 55 paıyzy kógildir otyndy paıdalanyp otyr. 170 myńnan astam abonenttiń 1656-sy zańdy tulǵalar, úı sany 168 624 boldy. Aldaǵy eki jylda olardyń sany 220 myńǵa jetkiziledi.
Názıra JÁRIMBET, «Egemen Qazaqstan»
QOSTANAI Sýretti túsirgen Ekaterına AFANASEVA