("Egemen" hat qorjynyndaǵy oqyrman lebizderi)
Jetistikterge jete beretinimiz sózsiz
Elimizdiń Tuńǵysh Prezıdenti N.Á.Nazarbaev halyqty ıgi isterge jumyldyrý, qoǵamdaǵy tatýlyq pen kelisimdi nyǵaıtý, búkil halyqaralyq qoǵamdastyqtyń rızashylyǵy men qurmetine ıe bolǵan jahandyq jáne óńirlik beıbit bastamalardyń avtory retinde eldiń syrtqy saıası baǵytyn dál aıqyndaý isine orasan zor úlesin qosyp keledi. Memleket basshysynyń jan-jaqty saralanǵan ishki jáne syrtqy saıasatynyń arqasynda elimiz saıası jáne áleýmettik-ekonomıkalyq silkinisterge ushyramaı, serpindi damý ústinde.
Barsha ultty baýyryna basqan baýyrmal qazaq halqy bireýdi artyq, bireýdi kem kórmegen. Tatýlyq pen dostyqty ózine ejelden serik etken. Qazaqstan – óz ulty, dini, tili, mádenıeti, tarıhy, salt-dástúri bar qudiretti el. Qazaqqa tán ata-babalarymyzdan qalǵan ar-namys, jiger-qaırat mura retinde keleshek urpaqqa jetken. Osy qalpymyzdan taıynbaı, barshanyń aldynda syılastyǵy mol, birligi jarasqan, qurmetteıtin el bolsaq mereıimiz artyp, jetistikterge jete beretinimiz sózsiz.
Gúlnar HODJABEKOVA, Mańǵystaý oblysy tótenshe jaǵdaılar departamentiniń baspasóz hatshysy
Ýaqytpen birge jańarǵan «Egemen»
Kitaphanashy bolý abyroıly qyzmet bolǵandyqtan eldegi bolyp jatqan ár ózgeristi qalt jibermeı baqylap otyrýǵa mindettisiń. Osy jaǵynan alǵanda biz úshin qoǵamnyń barlyq salasyn qamtyp otyrýǵa tyrysatyn elimizdiń bas gazeti «Egemen Qazaqstannyń» orny bólek. «Qaǵaz gazettiń ýaqyty ótti, endi jurt jańalyqty ınternet arqyly biledi» degen qasań kózqarasty joqqa shyǵaryp, ýaqytpen úndese jańaryp kele jatqan basylymnyń biri osy «Egemen» dep oılaımyn. Qoǵamdyq oqıǵalardyń eń mańyzdysyn bilgiń kelse oqıtyn gazet. Ár óńirde bolyp jatqan jaıttardy qaǵys qaldyrmaıdy, elimizdiń túkpir-túkpirinde ne bolyp jatqanyn bilý de árqaısymyzǵa mańyzdy. Sondyqtan shyǵar, «Egemenge» shyǵý ózge basylymdarǵa shyǵýdan mańyzdyraq bolyp turady. Sońǵy kezderi ádebıet pen mádenıetke de kóp kóńil bólip júr. Tanymdyq materıaldar da jıi shyǵady. Osy qarqynyn báseńdetpeı eldiń jaı-kúıin jıi jazyp tursa deımiz. Qoǵamnyń kóleńkeli tustaryn basqa emes, bas gazet jazsa, sheshilýi de jyldam ári ońaı bolady ǵoı dep oılaımyn.
Taǵy bir qýantarlyǵy – gazettiń dızaıny. Qaǵazdyń sapasy da biz úshin mańyzdy. Keı gazetter maılanyp, ustasań qolyńa juǵyp, kóp ótpeı sarǵaıyp ketedi. Al «Egemen Qazaqstan» óte sapaly. Qaǵazdyń sapasynan bastap, maqalalardyń ornalasýyna deıin óte mańyzdy. Qolǵa ustaýǵa da yńǵaıly. Ashyp qalǵanda jarqyrap tursa – qandaı jaqsy. Sosyn gazetke ornalastyrylǵan QR kod. Bul da kitaphanashylardyń jumysyn birshama jeńildetti. Baıaǵydaǵydaı kóshirme jasap áýre bolmaısyń, kerek etken adam kod arqyly ózine kerekti nómirdi júktep alady. Bul da ózge basylymdar úlgi alatyn jaıt. Gazet ujymy «El gazeti» degen atqa laıyq qyzmet ete beredi dep senemiz.
Quralaı ALTYNBEKOVA, S.Seıfýllın atyndaǵy Almaty oblystyq ámbebap kitaphanasynyń ádiskeri
Almaty oblysy
On bir ımamǵa jalaqy beredi
Din isteri jáne azamattyq qoǵam mınıstrliginiń bastamasymen elimizde ártúrli áleýmettik jobalardy qoldaý maqsatynda «Ýaqyp» korporatıvtik qaıyrymdylyq qory qurylǵan bolatyn. «Ýaqyp» sózi arab tilinen alynǵan, qaıyrymdylyq uǵymyn bildiredi. Atalǵan qordyń qyzmeti áleýmettik álsiz toptar men múmkindigi shekteýli jandarǵa kómek kórsetýge, dinı ekstremızmniń aldyn alýǵa, ımamdardyń kásibı biliktiligin arttyrýǵa, din qyzmetkerleriniń áleýmettik máselelerin sheshýge baǵyttalǵan. Qor qazirgi qalyptasý kezinde demeýshilerdiń kómegine arqa súıep otyr. Osy qor arqyly bilikti ımamdardy aýyldyq jerlerge tartýǵa yntalandyrý, ımamdardyń jalaqysyn kóterý, meshitterdiń kommýnaldyq shyǵyndaryn tóleýge kómektesý syndy birqatar qordalanǵan máselelerdi sheshý josparlanýda. Búgingi tańda oblys aýmaǵynda atalǵan qordy tanystyrý jumystary júrgizildi. Qazir óńir boıynsha 11 ımam «Ýaqyp» qorynyń demeýshiligimen aılyq jalaqymen qamtamasyz etilip otyr.
Dáýlet qajy QABIBOLDIN, oblystyq «Halıfa Altaı» meshitiniń naıb ımamy
О́skemen
Tabıǵaty erekshe edi
Men naǵashy apam Ońalaı Qalybekovany árkez maqtan tutamyn, úlgi etemin. Ońalaı – sheshemniń sińlisi. Bul apataıym týraly qansha aıtsam da estelikterim jyr-dastan sekildi taýsylmaıdy. Ol on bir bala tárbıelep ósirgen naǵyz batyr ana. Bári de joǵary bilim alǵan, ár salada qyzmet etedi. Jetijyldyq ortalaý mektepti bitirip, kári áke-sheshesine qaraılap oqı almaı qaldy. On jeti jasynda turmys qurdy. О́ziniń balalaryna toǵyz jastaǵy sińlisi Tolǵanaıdy qosyp, barlyǵyn da aıaǵynan tik turǵyzdy. Jezdem Janaıdardy da oqytyp, bildeı ınjener-mehanık etip shyǵardy. Tabıǵat oǵan óleń jazý, sýyrypsalmalyq sııaqty týma qasıetti aıamaı bere salǵan. Shabyty kelgende kúı talǵamastan otyrǵan jerinde albom, bloknottyń ishine jazyp tastaıtyn. Artyna osynsha mol mura qaldyratynyn bilgen joqpyz. Keıingi urpaqtary «Jyr dápterim, balalaryma arnaǵan syr dápterim» degen óleńder jınaǵyn bastyryp shyǵardy. Aýyldaǵy áıelder keńesiniń tóraıymy boldy, «Ájeler» ansamblin qurdy. Birde belgili qoǵam qaıratkeri Murat Áýezovpen kezdesý ótkende apamyz eshqandaı qaǵazǵa qaramastan tolǵana, shabyttana sóılegeni bar. Sonda Murat Muhtaruly «El ishindegi týma talanttar ǵoı», dep tamsanǵan. Ýaqyt kóshin aǵysy qatty, tolqyny asaý taıdaı týlaǵan telegeı teńizge teńeıtin bolsaq, onyń arasynda jutylyp ketpeı óz jolyn tapqanyna, artyna umytylmas úlgi-ónege qaldyrǵanyna shúkirshilik deımiz.
Orynsha JÚNISOVA, eńbek ardageri Soltústik Qazaqstan oblysy, M. Jumabaev aýdany