Táýelsizdiktiń jıyrma altynshy tańy Qaraǵandydaǵy «Tańsholpan» balalar úıinde ǵajaıyp túrde atty.
Taıaýda Ekaterına Dvoreskaıa esimdi 19 jastaǵy arý «Qaraǵandy arýy-2017» baıqaýynda jeńimpaz atanyp, báıgede enshilegen jarty mıllıon teńge qarjyny balalar úıindegi jetim balalarǵa aýdarmaqqa nıet etken bolatyn. Ekaterına ýádesinde turyp, Táýelsizdik kúnine oraı balalarǵa syılyq jasady.
«3 jyl buryn «Tańsholpan» balalar úıine erikti retinde kelgen edim. Sondyqtan aqshalaı syılyqty alǵannan keıin, ony balalarǵa syılaýdy uıǵardym», deıdi Dvoreskaıa.
Mekemeniń oqý isi boıynsha dırektorynyń orynbasary Gúlmıra Maıqambaevanyń sózinshe, olar syıǵa berilgen aqshaǵa fotoapparat, mýzykalyq aspaptar men úıirme jumysyna arnalǵan materıaldar almaq.
Aıta keteıik, Dvoreskaıa búginde Almatydaǵy joǵary oqý oryndarynyń birinde halyqaralyq qatynastar mamandyǵy boıynsha bilim alýda. Atalǵan baıqaýǵa ol Temirtaý qalasynyń atynan qatysqan bolatyn.
Mıras ASAN, «Egemen Qazaqstan»
Qaraǵandy oblysy