Eki qyzyn tórt jyl boıy baǵyp-qaǵyp ósirgen Danııar Toqjanov sot sheshimin amalsyz oryndap, jazasyn ótep shyqqan burynǵy áıeline berýge májbúr boldy.
24 jastaǵy Marııash esimdi kelinshek alaıaqtyq jolmen 31 adamdy aldap, 71 mıllıon teńgeni qaltaǵa basqany úshin abaqtyǵa qamalǵanda Ádemi eki jasta, Aıdana tórt aıda qalǵan. Ol túrmeden bosaǵan soń balalardy óz erkińmen ber dep birneshe ret talap etkenimen munysynan túk ónbesin bilip, sotqa júgingen. Sot oryndaýshylar men tártip saqshylarynan quralǵan top páterge kelip, sot sheshimin kúshtep oryndaýǵa kiriskende ákesinen bir eli ajyramaǵan búldirshinder úıdi basyna kóterip, qulyn daýsy shyrqyraı shyqqanda kórshilerdiń saı-súıegin syrqyratty. Analary abaqtyǵa toǵytylǵanda esteri kire qoımaǵan ekeýi ony múldem bóten adamǵa joryp, záre-quttary qalmaı azar da bezer boldy.
Sot oryndaýshy Andreı Vahrameevtiń aıtýynsha, zań talaptary boıynsha balalar anasymen birge turýǵa mindetti. Sot sheshimi shyqqandyqtan kúshtep alýǵa tolyq qaqylary bar.
Bostandyqtyń taza aýasyn jutqan kelinshek bolsa kinásin túsingenin, abaqtyda tiginshi mamandyǵyn ıgergenin, jumysqa ornalasatynyn, qyzdaryn tárbıeleı alatynyn alǵa tartady.
Sábılerdiń janushyra qarsylasqandaryna qaramastan aqyry alyp ketti. Kóz jasyna erik bergen áke jalǵyz qala berdi.
О́mir ESQALI, «Egemen Qazaqstan»
Soltústik Qazaqstan oblysy