Keshe Syrtqy ister mınıstrliginde Syrtqy saıası vedomstvo basshysy Qaırat Ábdirahmanovtyń tóraǵalyǵymen Qazaqstan Respýblıkasy Prezıdentiniń janyndaǵy Jappaı qyryp-joıý qarýyn taratpaý máseleleri jónindegi komıssııanyń 14-otyrysy ótti. Bul týraly Qazaqstan Respýblıkasy Syrtqy ister mınıstrliginiń Baspasóz qyzmeti habarlady.
Otyrys barysynda ıadrolyq qarýdy taratpaý, ulttyq eksporttyq baqylaý júıesin jetildirý máseleleri, sondaı-aq Qazaqstannyń aldaǵy BUU Qaýipsizdik Keńesindegi tóraǵalyǵy talqylandy.
Q.Ábdirahmanov Komıssııa jumysynyń birqatar nátıjelerin atap ótti. Sońǵy kezdesýden keıin О́skemen qalasyndaǵy Úlbi metallýrgııalyq zaýyty negizinde Atom Qýaty Halyqaralyq Agenttiginiń Tómen baıytylǵan ýran banki ǵımaraty ashyldy, sondaı-aq Qazaqstannyń teńgerimine bıologııalyq qaýipsizdik deńgeıin nyǵaıtýǵa jáne Qazaqstan, Reseı Federasııasy, Ortalyq Azııa jáne basqa shetel ǵalymdarynyń ǵylymı qyzmetiniń sapasyn arttyrýǵa baǵyttalǵan biregeı Ortalyq referens-zerthana qabyldandy.
Komıssııa otyrysynyń qorytyndysy boıynsha tıisti memlekettik organdarǵa ulttyq eksporttyq baqylaý júıesin odan ári jetildirý, ıadrolyq qarýdy taratpaý rejımin nyǵaıtý, sondaı-aq Qazaqstannyń BUU Qaýipsizdik Keńesindegi tóraǵalyǵy aıasynda is-sharalardy ázirleý men ótkizý boıynsha naqty tapsyrmalar berildi.
Jappaı qyryp-joıý qarýyn taratpaý máseleleri jónindegi komıssııa Qazaqstannyń qarýsyzdandyrý jáne ıadrolyq qarýdy taratpaý salasyndaǵy halyqaralyq mindettemelerin oryndaýǵa arnalǵan arnaıy jumys organy bolyp tabylady. Sondaı-aq Komıssııa Qazaqstannyń jahandyq qaýipsizdik máseleleri boıynsha halyqaralyq bastamalaryn iske asyrýda mańyzdy qural bolyp tabylady.