Buǵan deıin de almatylyq Danelııa Tóleshova Ýkraınada ótken «Golos. Ditı» shoýynda tabysqa jetip, baıqaýdyń aqtyq synyna joldama alǵanyn baıandaǵanbyz.
Oǵan qosa Tóleshovaǵa «Golos. Ditı» shoýynyń ánshini kórmeı baǵalaý kezeńinde qazylar alqasynyń barlyq múshesi birdeı burylýǵa sanaýly sekýndtar ǵana jetkilikti bolǵanyn da jazdyq.
Ýkraınalyq shoýdyń tórtinshi maýsymyna Dıma Monatık, «Vremıa ı Steklo» toby men Natalıa Mogılevskaıa syndy tanymal ánshiler tálimger bolsa, almatylyq ánshi eń kóp qaralǵan oryndaýshylar ishinde kósh bastap, YouTube juldyzyna aınalyp shyǵa keldi. Sahnada ǵaryshtan túsken adam sııaqty beıne qalyptastyrǵan baldyrǵan kórermenderdiń ólsheýsiz qoshemetine bólendi.
Shoýdyń taǵdyrsheshti sátterinde qazaqstandyq jas talant 5 án oryndady. Onyń ishinde «Golos. Ditı» shoýynyń ánurany men Dıma Monatık arnaıy osy baıqaýdyń aqtyq syny úshin jazǵan «Spectrum» Florence, «Aqyldy aǵashtary» da aıtyldy. Sońǵy sátte ol Monatik, Nıno Basılaıamen birge «Okean Elzy» tobynyń «Ne tvoıa voına» ánin shyrqap qana qoımaı, jınalǵandardyń kózine jas alǵyzdy, kópti tebirentti.
Baıqaýdyń óne boıynda ánshi balaqaı tyńdarmandaryn erekshe daýsymen, perishtedeı shynaıylyǵymen baýrap alǵanyn moıyndaý kerek. Danelııanyń oryndaýyndaǵy «Ne tvoıa voına» áni zaldyń jartysyn jylatty.
«Danelııa erekshe, ǵaryshtan kelgen sııaqty. Saǵan qol tıgizip kórgim keledi. Sen ǵajapsyń! Ýkraına prezıdentinen sen úshin azamattyq berýin surar edim», deıtin Natalııa Mogılevskaıanyń sóziniń jany bar.
Qazaqstandyq talantqa tálimger bolǵanyn Dıma Monatık te mártebe sanady. «Meniń komandamda osyndaı balalar bolǵanyn maqtanysh tutamyn. Danelııa osy maýsymnyń oljasy boldy. Álemdik deńgeıdegi ártister qandaı bolady dese, meniń kóz aldyma Danelııa keledi», dedi Dıma Monatık.
Osylaısha ánshi balapannyń kezekti armany oryndaldy. Bastapqyda ol «Golos. Ditı» shoýyna qatysýdyń ózin mártebe sanasa, óner jarysy qyza kele jeńis úshin kúresti jáne óziniń laıyqty baǵasyn aldy. Tanyldy, talaı dostar tapty. Tyńdarmannyń da qazylar alqasynyń de, tálimgerleriniń de súıkimdisi boldy.
Aıtqandaı, YouTube arqyly Almatynyń 11 jastaǵy darynyn 6 mıllıonnan astam adam tamashalady. Aqtyq synda Tóleshova Iаna Gornaıa, Aleksandr Mınenok, Elızaveta Iаkovenko, Katerına Manýzına, Nıno Basılaıa sııaqty daryndylarmen baq talastyrdy.
Aınash ESALI, «Egemen Qazaqstan»
ALMATY