«Qazaqstan» ulttyq telearnasynyń Jańa jylǵa daıyndaǵan baǵdarlamalarynyń tanystyrylymy ótti. Mereke qarsańyndaǵy apta máńgilik mahabbat jaıly ańyz negizinde túsirilgen «Qozy Kórpesh-Baıan Sulý» atty 6 bólimdi kórkem telehıkaıanyń tusaýkeserinen bastalady.
«25-29 jeltoqsan aralyǵynda kúndelikti saǵat 21.45-te ulttyq arna kórermenderi qazaq mádenıeti men óneriniń uly murasynyń ekrandalýyn tamashalaı alady. Telehıkaıanyń bas prodıýseri – Baıan Maqsatqyzy. Ssenarıı avtory – Ánnes Baǵdat. Basty rólderdi Gúlzada Turlash, Erjan Muqataev, Baqtııar Qoja, Jaqsybek Qurmanbekov pen Marat Abaı-Dildá syndy akterler somdady. Senbi kúni, 30 jeltoqsanda, saǵat 20.00-de birneshe aı boıy kórermenderge kásipkerliktiń qyr-syryn ashyp, bıznestiń ońtaıly jolyn kórsetken «Úmitker» realıtı-shoýynyń sheshýshi shyǵarylymy ótedi. Sondaı-aq jańajyldyq jobalardyń arasynda «Ázil álemi», «Tamasha» ázil teatrynyń 90-jyldary túsirilgen eń úzdik toptamalary, elimizdiń tanymal vaınerleri, beıneblogerleri men qoǵam qaıratkerleriniń qatysýymen ótetin arnaıy «HA-HA shoý: Jańajyl-2018» jobasy kórermenge jol tartady, dedi «Qazaqstan» ulttyq telearnasynyń basqarma tóraǵasy Erlan Qarın.
Sonymen qatar ol mereke kúnderi «Men qazaqpyn» halyqaralyq megajobasynyń gala-konsertiniń qaıtalaýy men merekelik konsertterdi tamashalaı alatynyn jetkizdi.
«31 jeltoqsan saǵat 22.30-da tanymal shoý-bıznes juldyzdarynyń qatysýymen jańajyldyq sıqyrǵa toly «Syńǵyrlaǵan sıqyrlar» merekelik shoý-baǵdarlamasy efırge jol tartady. Atalmysh jobaǵa Kámshat Joldybaeva, Aıgúl Imanbaeva, Búrkit, Álı Oqapov, Aıqyn Tólepbergenov, Kesh You, Qanat Úmbetov, Álııa Ábiken, Tóreǵalı Tóreáli, Oljas Abaı jáne «Qazaqstan» arnasynyń tanymal júrgizýshileri Janserik Beıseev, Aısulý Ryspanova, Irına Ten, Baıan Baqkeldiqyzy, Nartaı Aralbaıuly qatysady. Eń kishkentaı telekórermenderimiz úshin 31 jeltoqsan saǵat 12.35-te áıgili «Walt Disney» kınokompanııasynyń qazaq tiline dýblıajdalǵan «Rapýnsel» mýltfılmi kórsetiletin bolady», dedi ol.
Raýan QAIDAR, «Egemen Qazaqstan»