Álem ádebıetindegi biregeı epıkalyq shyǵarma – qyrǵyzdyń «Manas» jyrynda «Qazaq, qyrǵyz, qataǵan – taraǵan bir atadan» degen jyr joldary bar. Osy oraıdan alyp qaraǵanda, Qazaqstan Prezıdenti Nursultan Nazarbaevtyń Qyrǵyzstannyń Prezıdenti Sooronbaı Jeenbekovti Astanaǵa shaqyryp, máslıhat qurǵany úlken tarıhı oqıǵa bolyp qaldy. Bul jalpy qyrǵyz jurtshylyǵy jáne Qyrǵyzstandaǵy etnostyq qazaqtar kútken júzdesý boldy.
Shavkat ISMAILOV, «Qyrǵyzstan – Astana» qyrǵyz etnomádenı birlestiginiń tóraǵasy, Qazaqstan halqy Assambleıasynyń múshesi:
– Qazaqstan Respýblıkasynyń Prezıdenti Nursultan Nazarbaev pen Qyrǵyz Respýblıkasynyń Prezıdenti Sooronbaı Jeenbekovtiń Astanadaǵy kezdesýinde qyrǵyz-qazaq qarym-qatynastarynyń qazirgi kezdegi kókeıkesti máseleleri bolǵan shekara jáne eńbek mıgranttary boıynsha maquldasylǵan qujattarǵa qol qoıylýyn Qazaqstandaǵy etnostyq qyrǵyzdar shoń qýanyshpen qabyl aldy.
Bizdegi málimet boıynsha, osy kúnderi ulty qyrǵyz 370 myń jerlesimiz Qazaqstannyń azamattyǵyn alyp, kópultty Qazaqstannyń qarashańyraǵynyń bir qanatyna aınaldy. Eńbek mıgranttarynan – 1700-ge jaqyn qyrǵyz azamaty respýblıkada ýaqytsha turýǵa yqtııarhat arqyly tirkelgen jáne 30-50 myńdaı qyrǵyz azamaty kelip-ketip jumys istep jatyr, barlyǵy jıylyp 100 myńnyń ár jaq-ber jaǵyn quraıdy.
Eýrazııalyq ekonomıkalyq odaq aıasynda júrgizilip jatqan is-sharalar ólkelerimizdiń ár tarapty damýyna serpin beretininde kúmánimiz joq. Al endi Astanadaǵy 25 jeltoqsanda bolǵan alqaly basqosý baýyrlas qyrǵyz-qazaq halqynyń dostyq qarym-qatynastaryn nyǵaıtýǵa jańa dem berdi.
Jolbarys JORABEKOV, Júsip Balasaǵun atyndaǵy Qyrǵyz ulttyq ýnıversıtetiniń professory, saıasattaný ǵylymdarynyń doktory:
– Prezıdent Nursultan Nazarbaev óziniń kemeńger Elbasy ekendigin is júzinde dáleldedi. Qazaqstan shırek ǵasyrda álemdegi ekonomıkasy damyǵan aldyńǵy qatarly memleketterdiń qataryna qosyldy. Onyń kótergen ıdeıalary árqashanda oryndalyp otyr. Astana qalasyn salý bastamasy nátıjesin berdi. TMD elderiniń seriktestigin jáne Eýrazııalyq ekonomıkalyq odaqty qurý usynystary tıimdi júzege asyryldy. Endi Qyrǵyzstan jáne О́zbekstan respýblıkalary men mámileler ońdalyp, Nursultan Nazarbaev aıtyp júrgen Ortalyq Azııa odaǵyn qurý máselesi de sheshimin kútip turǵan sııaqty.
Nursultan Nazarbaevtyń oı-óresiniń, ekonomıkalyq biliminiń bıiktigine tánti bolyp júrgen adamdardyń birimin. Bul týraly qyrǵyz baspasózinde de talaı jazǵanmyn, qazir de jazyp, elektrondy aqparat quraldarynan aıtyp júrmin.
Qazaqstandy órkendetýde birinshi kezekte ekonomıkany alǵa qoıǵan Qazaqstan basshysy bıyl rýhanı sanany jetildirýge bet burdy. N.Nazarbaevtyń bıylǵy kóktemde jarııalanǵan «Bolashaqqa baǵdar: rýhanı jańǵyrý» baǵdarlamalyq maqalasynda osy baǵytqa kóńil burylypty.
Taıaýda, ıaǵnı 22 jeltoqsanda Nursultan Nazarbaevtyń jyl qorytyndysy boıynsha buqaralyq aqparat quraldarynyń ókilderimen kezdesýinde jýrnalısterdiń ártúrli suraqtaryna naq, baıypty jáne syndarly jaýap bergenine súısinbeý múmkin emes. Nursultan Nazarbaev ekonomıka, áleýmet, mádenıet, bilim berý, rýhanııat, densaýlyq saqtaý, qysqasy, eldi tolǵandyrǵan barlyq saladaǵy máselelerdi sheshýde kóregendik tanytyp otyrǵanyn aıqyn baıqadym. Prezıdent Nursultan Nazarbaevtyń kemeńgerligi arqasynda qyrǵyz-qazaq mámilesiniń budan ári berik bolýyna dańǵyl jol ashylyp otyr.
Erǵalı ÁBDIQAIYMOV, Qyrǵyzstan qazaqtary qaýymdastyǵy tóraǵasynyń orynbasary, zań ǵylymdarynyń kandıdaty:
– Elbasy Nursultan Nazarbaevtyń jaqynda Qyrǵyzstan Prezıdenti bolyp saılanǵan Sooronbaı Jeenbekovpen jyly ráýishte suhbattasyp, aǵalyq iltıpatyn kórsetkeni meni qatty tolǵandyrdy. Qazaq-qyrǵyz qarym-qatynasynyń joǵary deńgeıge kóterilgeni Qyrǵyzstanda turyp jatqan qazaqtar úshin ábden mándi ekeni kimge bolsa da túsinikti. Qazaq jáne qyrǵyz elderi eski zamandarda, negizinen, óz rý-rýymen, óz ata-babalaryna tıesili jerlerinde qonystanǵan. Qazaqtardyń Qyrǵyzstanǵa kelý úderisi 1916 jylǵy ult-azattyq kúresi kezinde bastalǵan. Ekinshi býyny 1930-jyldardan bastap keldi. Úshinshi býyny keńes jyldarynda ortaq Odaqtyń aıasynda jumys, oqý babymen kelgender.
Men Otanyma jıi-jıi at basyn buryp turamyn. Eki eldegi de jaǵdaıattardy jaqsy bilemin. Qazaq pen qyrǵyzda «Esigin kórip, tórine ót!» deıdi. Qazaq-qyrǵyz shekarasyndaǵy túıtkildi máselelerdi sheshýdiń baǵytyn dúnıejúzi qazaqtarynyń kóshbasshysy – Elbasymyz Nursultan Ábishuly kórsetip berdi. Memleket basshylary jasaǵan ýaǵdalastyqtar eki eldiń yntymaqtastyǵyn arttyryp, ıgilikterge jol ashatynyna kámil senimdimin.
Jazyp alǵan Nazarbek SATTAR, arnaıy «Egemen Qazaqstan» úshin
BIShKEK