Asa qurmetti oqyrman!

Táýbe! El ómiriniń eń basty jarshysyna aı­nal­ǵan bas basylym úshin de 2017 jyl shyn máninde tabysty jylǵa aınaldy. Gazetimizdiń «Strategııalyq damý tujyrymdamasy» negizinde 2017 jyly alǵa qoıǵan bir jyldyq mindetterimizdi tolyqtaı iske asyrdyq. Bas basylymda jasalǵan formattyq, dızaındyq jáne mazmundyq ózgerister tolyǵymen ornyqty.

 Osy ózgeristerdiń nátıjesinde «Egemen Qazaq­stan» memlekettik saıasatty jazyp kórsetý turǵy­synan ǵana emes, qoǵamda jáne tórtkúl dúnıede bolyp jatqan mańyzdy oqıǵalardy halyqqa jan-jaqty ári tushymdy dáıektermen jetkizý isinde de aqparat quraldarynyń flagmanyna aınalyp, otandyq medıa keńistiktegi orny men salmaǵyn nyqtaı tústi. Máselen, Elbasynyń jyl basynda jarııalaǵan «Jańǵyrtý 3.0» atty Joldaýy elimizdiń úshinshi jańǵyrý kezeńindegi strategııalyq damý maqsattaryn belgilep berse, «Bolashaqqa baǵdar: rýhanı jańǵyrý» maqalasy halqymyzdyń rýhanı jańǵyrýynyń túp negizderi men aldaǵy baǵdaryn aıqyndady. Ásirese osy baǵdarlamalyq maqalanyń «Egemende» jaryq kórýi bas basylymnyń ǵana emes, tutastaı qazaq baspasóziniń, qazaq tiliniń mártebesin asyrdy. Kóptegen sheteldik basylymdar Elbasynyń osy maqalasyn óz tilderine aýdaryp basty jáne bastapqy derek kózi retinde «Egemen Qazaqstandy» belgiledi. Al gazetimizdiń ózinde «Rýhanı jańǵyrý» aıasyndaǵy taqyryptar boıynsha 1000-nan asa materıal jarııalandy.

Jalpy, ótken jyly eldi eleń etkizer oqıǵa­lar­dyń kóp bolǵanyn atap ótkim keledi. Jyl basynda álemdik mańyzy bar Qysqy Ýnıversıada oıyndary ótip, dúnıe júziniń nazary Qazaqstanda baq synaǵan sport sańlaqtaryna aýdy. Sondaı-aq elimizdiń quqyqtyq memleket retindegi aldaǵy damýynda zor máni bar konstıtýsııalyq ózgerister qabyldanyp, Prezıdenttiń birqatar ókilettikteri Parlament pen Úkimetke berildi. Al Qazaqstannyń BUU Qaýipsizdik Keńesiniń turaqty emes múshesi bolyp saılanýy ótken jyldyń halyqaralyq oqıǵalar sapyndaǵy eń úlken saıası jańalyqtarynyń biri bolǵany anyq. Bul qatarda ShYU, Islam Yntymaqtastyǵy Uıymy sammıtterin, Astana ekonomıkalyq forýmyn, sırııaaralyq kelissózderdiń asa mańyzdy dıalog alańy bolǵan Astana prosesiniń tabysty ótkenin de aıtýǵa bolady. 

Álbette, jyldyń mańyzdy oqıǵalarynyń qatarynda biz Ortalyq Azııada tuńǵysh ret ótken Astanadaǵy EKSPO-2017 halyqaralyq kórmesin aıryqsha aıtamyz. Álem elderiniń balamaly energetıka salasyndaǵy eń úzdik tehnologııalaryn nazarǵa tartqan bul kórmeni halqymyz erekshe yqylaspen tamashalady. Kórmeniń úsh aı ishindegi ekonomıkalyq tabysy óz aldyna, ondaǵy kóptegen ǵylym jáne tehnologııa jetistikteri, ıaǵnı EKSPO mu­ralary el ekonomıkasynyń túrli salalaryna en­gi­ziletin boldy. Eń bastysy da osy dep oılaımyz.

Biz osylaısha el tarıhyndaǵy aıtýly oqı­ǵa­lardy qamtı otyryp, oqyrman qaýymnyń tal­ǵamy men talabyn jańa aıdarlarymyzda eskerý­ge tyrystyq. Qyzmetkerlerimizdiń de sapalyq qura­my aıtarlyqtaı kúsheıtildi. Sol arqyly eko­nomıkalyq, halyqaralyq saraptamalar men qoǵamdyq mán-mańyzy zor, ózekti máselelerdi kótergen taldaý maqalalarǵa kóbirek oryn berdik. Ná­tıjesinde «Egemen» qoǵamdyq-saıası jáne áleý­mettik-ekonomıkalyq mańyzy zor kóptegen ózekti máselelerdi kóterip, olardyń memlekettik deńgeıde durys sheshilýine óz yqpalyn tıgizdi.

Osy oraıda gazetimizge 2018 jylǵa jazy­lym byltyrǵy mejeden de asyp túsip, 204 165 danaǵa jetkenin jáne «Egemen» qyzmetkerleri de 2017 jy­ly kóptegen memlekettik, vedomstvolyq marapat­tarǵa ıe bolǵanyn maqtanyshpen aıta otyryp, bul kórsetkish redaksııa jumysynyń talǵamy bıik oqyrmannyń talap údesinen shyǵa alǵandyǵynyń nátıjesi dep oılaımyz.

О́tken jyldyń taǵy bir úlken jańalyǵy – redaksııamyzǵa hat jazyp, kún saıyn habarlasyp jatatyn qalyń oqyrmannyń tilegin oryndaý maqsatymen «Egemen Qazaqstan» gazeti sońǵy 24 jylda tuńǵysh ret bólshek saýda jelisine túsip, kıoskilerde satyla bastady. Qazir bas basylymdy Almaty, Shymkent jáne Astana qalalaryn qosa alǵanda, 80-ge tarta kıoskiden tabýǵa bolady.

Saıtymyzda jyl basynan qazaq tilimen qatar oryssha aqpar taratýdy qolǵa aldyq, al qyrkúıekten bastap aǵylshyn tilinde álemge elimizdegi eleýli oqıǵalardy óz múddemiz turǵysynan aıtyp,  eleń etkizer jahandyq jańalyqtardy aǵylshyn tilinde taratyp kelemiz. Sondaı-aq aýdıo maqala qosýdy jolǵa qoıyp, saraptama men halyqaralyq jańalyqtardyń úlesin arttyrdyq. Qazir saıtymyz ben áleýmettik jelilerdegi oqyrmanymyzdyń sany 42 myńnan asady.

Qurmetti oqyrman, 2017-ni osyndaı nátı­je­ler­men aıaqtaǵan «Egemen Qazaqstan», mine, 2018-diń ta­bal­dyryǵynan attap, ár shańyraqqa Jańa jyldyń alǵash­qy jańalyqtaryn da ala keldi. Bıyl elimiz úshin de, elimizdiń bas gazeti «Egemen» úshin de aı­ryqsha mańyzdy jyl.

Birinshiden, Qazaqstan tórtkúl dúnıeniń tórine shyǵyp, BUU Qaýipsizdik Keńesinde tórelik etýin bas­tady. Bul tarıhta qalar sheshýshi sátterdiń biri ekeni belgili. Sonymen qatar 2018 jyl Álemdik jáne dástúrli dinder lıderleriniń kezekti sezi syndy ózge de aıtýly datalar men halyqaralyq, jahandyq mán-mańyzy bar is-sharalarǵa toly bolmaq. Olardyń negizgilerine qoldaryńyzdaǵy osy sanda múmkindiginshe sholý jasalǵanyn jáne aldaǵy ýaqytta bul taqyryptar «Egemenniń» nazarynda bolyp, oqyrmanǵa jan-jaqty jetkiziletinin aıtqym keledi.

Ekinshiden, bıyl «Egemen Qazaqstan» úshin óziniń 100 jyldyq mereıli belesin atap ótýge daıyndyq jyly bolmaq. Elimizdiń bir ǵasyrlyq damý jolynyń derekti shejiresin jazyp kele jatqan, memlekettik saıasattyń negizgi nasıhatshysy ári halyqtyń úni bolyp otyrǵan «Egemen Qazaqstan»  gazeti 2019 jyly júzge tolady. Álbette bul datany biz respýb­lıka kóleminde atap ótetin bolamyz. Bul oraıda biz gazettiń 1919 jyldan búginge deıingi sandarynyń arhıvin túgendep, sıfrly formattaǵy kóshirmelerin jasaýdy aıaqtaımyz. El tarıhyn baspasóz betinen zertteýshiler úshin bul zor tartý bolmaq.

Sóz sońynda gazetimizge jazylyp, el tynysyn «Egemenmen» tanyp otyrǵan oqyrmandarymyzǵa al­ǵy­symyzdy bildiremiz! Jańa jyl jaqsy jańa­lyq­tar jyly bolsyn!

Qurmetpen,

Darhan QYDYRÁLI