Eldiń damýy tek túrli baǵdarlamalarǵa «ilinip», bıýdjetten bólinetin qarjylarmen shektelip qalmaýy kerek. Osy oıdy ustanym etken mańǵystaýlyq kásipkerler týǵan jerdiń, týǵan eldiń kórkeıýine óz úlesterin qosyp keledi. О́ńirde alǵash ret uıymdastyrylǵan «Týǵan jerge – taǵzym» atty mesenattar forýmynda mańǵystaýlyq atymtaılardyń túrli áleýmettik jobalardyń iske asýyna 43 mlrd teńge qarajat jumsaǵany belgili boldy.
El úshin etigimen sý kesher erlerdiń orny qashanda bólek. Halqynyń jel jaǵynda júrip, jurtynyń qamyn jeý qazaqtyń qanynda bar qasıet. Kásibi órge domalap, násibi molaısa, «jemin shashyp» jeıtin azamattar – eldiń janashyrlary, táýelsizdiktiń nyǵaıýyna naqty isimen atsalysqan erler. Kásipkerler men halyq múddesin eskerip, olardyń eńbek pen iskerlik áreketteriniń belsendiligin arttyrý arqyly áleýmettik jobalardy iske asyrý, «Týǵan jer» baǵdarlamasy aıasynda óńirdiń damýyna úles qosyp, eldiń turaqty ekonomıkalyq keńistigin qalyptastyrý maqsatyndaǵy forým el men jerdiń kórkeıýine ár salada qomaqty úles qosqan kásipker azamattardy tanytty. Mańǵystaýda mesenattardyń qarjylaı qoldaýymen aýyldar abattandyrylyp, áleýmettik nysandar salynyp jatyr, sondaı-aq tarıhı eskertkishter men mádenı oryndardy qalpyna keltirýge baǵyttalǵan jobalar da bar. Bıyl 100 mesenattyń demeýshiligimen jalpy somasy 43 mlrd 699 mln teńge bolatyn 110 joba júzege asyrylǵan.
«Týǵan jer» baǵdarlamasy aıasynda halyqtyń jaǵdaıyn jaqsartyp, qoǵamdyq sanasyn jańǵyrtý maqsatynda, oblystyń damýyna yqpal etetin áleýmettik jobalardy usyný múmkindigi berilgen aýksıon ótti. Aýksıonǵa 7 joba usynyldy. Olardyń biri – jalpy quny 516 mln teńgelik Munaıly aýdanyndaǵy sportzal keshenin salý bolsa, ekinshisi – ınvestısııa kólemi 250 mln teńge qarajat bolatyn Túpqaraǵan aýdanyndaǵy sport kesheni. Sondaı-aq Aqtaý qalasynda Abaı Qunanbaev pen Nurmuhan Jantórınge arnalǵan eskertkish ornatý 80 mln teńgege túspek.
Forýmda «Rýhanı jańǵyrý» baǵdarlamasy aıasynda aımaqtyń klımattyq ereksheligine baılanysty oblystaǵy barlyq bilim berý uıymdarynda «Jasyl mektebim – jasyl mekenim» atty jobanyń tusaýy kesildi. Ekologııalyq máseleni sheshý úshin aınalany kógaldandyrý, balalardy eńbekke baýlý arqyly tárbıeleý, oqýshylarǵa arnalǵan ǵylymı-tájirıbelik ortalyq ashý, tamshylatyp sýarý, paıdalanǵan sýdy qaıta óńdeý arqyly jańa tehnologııalardy damytý, mektepterde óz ónimin qoldaný arqyly kásipkerlikti damytýdy jáne bıýdjetten tys ınvestısııalardy tartý máselelerin sheshýdi maqsat etken mesenattar mektep janynan óz qarajattaryna jylyjaı salýdy qolǵa aldy. Forým aıasynda aýksıonmen birge jańa jobalardyń kórmesi usynylyp, eline qyzmet etken atymtaılar marapattaldy.
Gúlaıym ShYNTEMIRQYZY, «Egemen Qazaqstan»
Mańǵystaý