Aqtaýda Memlekettik qyzmet isteri jáne sybaılas jemqorlyqqa qarsy is-qımyl agenttigi Mańǵystaý oblysy boıynsha departamentiniń uıymdastyrýymen sybaılas jemqorlyqqa qarsy is-qımyl jáne memlekettik kórsetiletin qyzmetter máseleleri boıynsha keńeıtilgen májilis ótti. Jergilikti jáne ortalyq atqarýshy organdardyń, «Azamattarǵa arnalǵan úkimet» memlekettik korporasııasy KEAQ oblystyq fılıalynyń basshylary men qyzmetkerleri qatysty.
Departament qoldaýymen memlekettik qyzmettiń oń ımıdjin jáne qoǵamda sybaılas jemqorlyqqa qarsy mádenıetti qalyptastyrý maqsatynda 698 is-shara uıymdastyrylyp, 170 myńnan astam adam qamtylǵan, sondaı-aq quramyna memlekettik organdardyń, úkimettik emes uıymdardyń, «Nur Otan» partııasynyń, О́ńirlik kásipkerler palatasynyń jáne basqa da salanyń ókilderi engen oblystyq sybaılas jemqorlyqqa qarsy mobıldik top óz jumysyn bastap, atalǵan top turǵyndar jáne eńbek ujymdarymen 159 kezdesý men qoǵamdyq qabyldaýlar ótkizip, jalpy sany 36 032 adamdy qamtydy. Qazirgi tańda mobıldik toptar qalalyq jáne aýdandyq deńgeılerde qurylyp, azamattardyń shaǵymdaryn jedel túrde qaraýdy júzege asyryp keledi.
Jıynda departamenttiń sybaılas jemqorlyq profılaktıkasy basqarmasynyń basshysy N.Aıtjanov bıylǵy jyldyń 11 aıynyń qorytyndysy boıynsha sybaılas jemqorlyq profılaktıkasy salasynda atqarylǵan jumystarǵa toqtalyp, «Esikten esikke», «Joldarda sybaılas jemqorlyqty tómendetýdiń 10 qadamy» jobalaryn júzege asyrý, sybaılas jemqorlyqqa qarsy mobıldik jáne arnaıy monıtorıng toptarynyń, «Adal urpaq» erikti mektep oqýshylary klýbtarynyń qyzmeti týraly, sonymen birge sybaılas jemqorlyqqa qarsy monıtorıng, sybaılas jemqorlyq táýekelderin taldaý jáne ákimshilik tájirıbe qorytyndylaryn baıandady.
Departamenttiń memlekettik kórsetiletin qyzmetter basqarmasynyń basshysy J.Marshakuly turǵyndarǵa memlekettik kórsetiletin qyzmetterdiń sapasyn kóterý salasyndaǵy negizgi baǵyttarǵa toqtalyp ótti. Budan basqa «Qupııa tutynýshy» ádisi boıynsha qoǵamdyq monıtorıngtiń nátıjelerine, departament tarapynan tekserý jumystary barysynda anyqtalǵan zańbuzýshylyqtar aıtyldy.
Jıynda aýyl turǵyndaryna qolaıly jaǵdaı jasaý maqsatynda aýyl ákimi apparattary ǵımarattarynda shtattan tys maman bólip, arnaıy kompıýtermen jabdyqtap, qala, aýdan ortalyǵyna barmaı-aq, elektrondy qyzmet alý múmkindikterin qarastyrý jóninde usynystar berilip, ol qala, aýdan ákimderi tarapynan qoldaý tapty. Memlekettik qyzmet kórsetý sapasyn ishki baqylaý jumystaryn jandandyrý maqsatynda, qala, aýdan ákimi apparattarynda óz aldyna ishki baqylaý bólimin nemese derbes qyzmetin qurý qajettigi aıtylǵan májiliste memlekettik organdar basshylaryna sybaılas jemqorlyqqa qarsy is-qımyl men memlekettik kórsetiletin qyzmetter salasyndaǵy kemshilikterdi joıyp, aldaǵy ýaqytta olardy boldyrmaý úshin naqty tapsyrmalar berildi.
Gúlaıym ShYNTEMIRQYZY, «Egemen Qazaqstan»
Mańǵystaý oblysy