Jol ústi. Kýpede tórt qazaq otyrmyz. Kondısıoner ýildep tur. Salqyn yzǵar boı tońazyta bastady. Al syrtta qyryq gradýs ystyq.
Qarsy aldymda otyrǵan jap-jas jigittiń júzi kúnge kúıip, totyǵyp qalǵan. Qaratory. Sonsoń... jastaý kelinshek. Jaz boıy uradan shyqpaı, búgin ǵana kún kózin kórgendeı appaq. Ekeýi resmı tilde sóılesip otyr.
Tyńdaǵan qulaqta jazyq joq. Jas jigit únemi saparda júretinge uqsaıdy. Jumys baby solaı kórinedi. Áke-sheshesi, otbasy Saryshaǵan stansasynda turady eken. Aıyna bir ret, eki ret kelem, ketem deıdi...
Al kún kózin kórmegen appaq kelinshek buǵan deıin Almaty men Astananyń arasyna tek ushaqpen ǵana qatynapty. Tek búgin ǵaıyptan taıyp, qaladaǵy kólik keptelisiniń kesirinen áýejaıǵa úlgere almaı, amal joq, poıyzǵa otyrǵan.
Bul meniń bir qulaǵymmen ǵana estip-bilip kele jatqandarym. О́ıtkeni ekinshi qulaǵymmen qasymdaǵy serigimniń áńgimesin tyńdap kelem. Biz ekeýmiz óz tilimizde, ıaǵnı, qazaqsha sóıleımiz ǵoı.
Kenet tereze jaqta otyrǵan qaratory jas jigit bizge qaraı moınyn buryp:
– Sizder qazaqsha taza sóıleıdi ekensizder, – dedi birtúrli tańdanǵan keıipte. – Al men qazaqsha teledıdar qarasam, túk túsinbeı qalam. Sonsoń: «Papa, ne týraly aıtty?» dep suraımyn ákemnen. Al ol: «Qazir orysshasy bolady ǵoı, balam. Sodan túsinip alarsyń deıdi».
Biz, serigim ekeýmiz bir-birimizge yńǵaısyzdana qarap, uly dalaǵa basqa bir planetadan kelgen qonaqtar sekildi birtúrli qysylyp qaldyq...
Nurǵalı Oraz, «Egemen Qazaqstan»