Qazaq memlekettik qyzdar pedagogıkalyq ýnıversıtetinde «Mektepke deıingi jańartylǵan bilim berý jaǵdaıynda bolashaq mamandardy daıarlaý máseleleri» taqyrybynda alqaly jıyn ótti, dep habarlaıdy oqý ornynyń baspasóz qyzmeti.
Bilim jáne ǵylym mınıstrliginiń joǵary jáne joǵary oqý ornynan keıingi bilim berýdiń respýblıkalyq oqý-ádistemelik keńesiniń oqý-ádistemelik birlestiginiń arnaıy baǵdarlamasyna sáıkes uıymdastyrylǵan májilistiń ótýine Qyzdar Ýnıversıtetiniń Pedagogıka jáne psıhologııa fakýlteti muryndyq boldy.
Sharaǵa otandyq joǵary oqý oryndarynyń professor-oqytýshylary, «О́rleý» biliktilikti arttyrý ulttyq ortalyǵynyń qyzmetkerleri men balabaqsha, mektep jáne kolledj muǵalimderi qatysty.
Jıyndy pedagogıkalyq ýnıversıtettiń oqý jáne tárbıe isteri jónindegi prorektory Abaı Qurmanqulov ashyp, Qyzdar Ýnıversıtetinde «Mektepke deıingi oqytý jáne tárbıeleý» mamandyǵy boıynsha birqatar jumystar atqarylyp jatqandyǵyn tilge tıek etti. Budan ózge sala mamandary jańartylǵan bilim berý baǵdarlamasyna saı bolashaq mamandardy daıyndaý máselesi, mektepaldy daıyndyqtan jańa «Álippeniń» engizilý jaıy, atalǵan ózgeristerge sáıkes mamandyqtyń bilim berý baǵdarlamasyndaǵy ózgerister jaıy sóz boldy.
Mektepaldy daıyndyq synyptaryna arnalǵan «Álippe» oqýlyǵynyń avtorynyń biri, QazMemQyzPÝ-dyń Pedagogıka-psıhologııa fakýltetiniń dekany Saırash Jıenbaeva atalǵan oqý quralynyń qurylymynyń teorııalyq-ádisnamalyq negizderine keńinen toqtalyp, ondaǵy balalardyń jas ereksheligine qaraı túrli oıyndar men qoldarynyń motorıkasyn damytýǵa baǵyttalǵan ádistemelerdi áńgimeledi. Sonymen qatar, Abaı atyndaǵy Qazaq ulttyq pedagogıkalyq ýnıversıtetiniń Pedagogıka jáne psıhologııa fakýltetiniń dosenti, pedagogıka ǵylymdarynyń kandıdaty, «Býkvar» oqýlyǵynyń avtory Larısa Lebedeva aldaǵy ýaqytta maman daıarlaýda saýat ashý negizderin oqytý ádistemesi pániniń engizilý qajettigin alǵa tartty. Al, «О́rleý» biliktilikti arttyrý ulttyq ortalyǵynyń Mektepke deıingi bastaýysh bilim kafedrasynyń meńgerýshisi, PhD doktory A. Turalbaeva jańartylǵan mektepke deıingi bilim berý baǵdarlamasyna oraı Qyzdar Ýnıversıtetiniń oqytýshylarymen birge pedagog-tárbıeshilerge arnalǵan kýrstardyń júrgizilip jatqandyǵyn baıandady. Sondaı-aq, ol elimizde birneshe baspa úıleri ózderiniń baǵdarlamasy negizinde «Álippe» oqý-ádistemelik keshenin daıyndaǵanyn, atalǵan joba búginde aprobasııadan ótip jatqanyn aıtty.
Májilis sońynda mektepaldy daıyndyq synyptaryna arnalǵan «Álippeniń» engizilýine baılanysty «Mektepke deıingi oqytý jáne tárbıeleý» mamandyǵy boıynsha bilim berý baǵdarlamasyna elektıvti pán retinde engizý qajettiligi týraly arnaıy sheshim qabyldandy.