Ol Jambyl aýylyndaǵy mekteptiń kitaphanasynan oryn alypty. «Maqta qyz», «Tazsha bala», «Mystan kempir», «Baýyrsaq», «Maqtanshaq bala», «Túlki men qumyra», «Bes eshki» sııaqty qazaq jáne orys ertegileri, jan-janýarlar beınesindegi qýyrshaqtar – úıirmeniń basty keıipkerleri. Shaǵyn teatr qorynda 50-deı qýyrshaq bar.
Úıirme «Ertegiler áleminde» dep atalady. Kitaphanaǵa kirgen bette qýyrshaqtar qarsy alady. Kitaphanashy Janar Qoıshybaıqyzy ertegi keıipkerlerine kıimderdi de ózi tigedi eken. Jumsaq oıynshyqtardy satyp alady. Olardy sógip, qolǵa yńǵaılap qaıta tigip shyǵady. Jumys ústeli túrli-tústi qaǵaz, karton, matalar, jipter, maqta, monshaqtar, aǵash, teri, boıaýlarǵa toly. Kezekti ertegi qoıylymyna daıyndalýda. Sahnalyq kórinisti de ózi dekorasııalaıdy. Maqsaty – oqýshylardyń ádebıetke qushtarlyǵyn oıatý, olardy kitap oqýǵa yntalandyrý, teatr, óner álemine degen qyzyǵýshylyqtaryna múmkindik berý. Úıirme aýdan ortalyǵyndaǵy «Psıhologııa-pedagogıkalyq túzeý ortalyǵynda» tárbıelenip jatqan múmkindigi shekteýli balalarǵa ertegilerin kórsetip, qýantyp qaıtypty.
– Alǵashynda qýyrshaqtardy qaǵazdan jasadym. Qolǵa kıgende qýyrshaq qımylǵa keletindeı bolýy kerek. Jip nemese sym arqyly qozǵaltatyn túrleri de bar. Sahnalyq qoıylymdarǵa keıipker retinde qatysý oqýshylarǵa, árıne óte qyzyq, deıdi Janar Qoıshybaıqyzy.
Sahnanyń ertegi mazmunyna saı bezendirilýi, ásem tabıǵatty jandandyratyn dybystarǵa erekshe úılesimdilik qajet. Úıirmege Tomırıs Abdrahmanova, Mahabbat Júnisova, Aıajan Aıtqulova, Margarıta jáne Karına Kıchıgınalar, Sofııa Kozınskaıa, Vıka Treba sııaqty mektep oqýshylary turaqty túrde qatysady.
Janar Qoıshybaıqyzynyń aıtýynsha, mektep kitaphanasy jumysyn negizi 3 tilde júrgizip, jyl mezgilderine baılanysty oqýlar uıymdastyrady. Bıyl «Nedelıa detskıh skazok», «Mır knıg v mıre detstva», «Pýteshestvııa v mır skazok», «V gostıah ý Andersona», «V gostıah ý Pýshkına» jáne basqa ertegiler boıynsha da úsh tilde oqýlar ótkizedi. Oqýshylar qazaq, orys, aǵylshyn tilderindegi óleńderdi mánerlep oqyp nemese jatqa aıtyp, bilim-bilikterin damytady. Úıirmege qatysýshy oqýshylar ertegilerdi de úsh tilde sóıletip, beıneleıdi.
– Ertegini oqımyz, taldaımyz. Ár oqýshynyń qabiletine saı keıipkerlerdiń rólin beremin. Sahnaǵa shyqqan saıyn shyǵarmashylyq shabyt, izdeniske túsedi. Saýsaqtardy jattyqtyramyz. Balalar kıimderdi saýsaqtaryna kıedi. Erteginiń mátinin aıta otyryp saýsaqtaryn qımyldatyp, sıýjet jasaıdy. Kórinisti perdeniń syrtynda turyp nemese qozǵala júrip kórsetedi. Teatrdaǵydaı daýys yrǵaǵy, bet álpetiniń ózgerýi, qol qımyldary, dene bitiminiń ózgerýi, júris-turys qozǵalystaǵy beıneler kórsetiledi, deıdi úıirme jetekshisi.
Qazir úıirme oqýshylary E. Elýbaevtyń «Asar», Qadyr Myrza Áliniń «Qotyr torǵaı» jáne «Ur, toqpaq!» sekildi ertegilerin oqyp daıyndalýda. Jyl saıyn 30-daı ertegi sahnalanady.
Farıda BYQAI,
«Egemen Qazaqstan»
Pavlodar oblysy,
Lebıaji aýdany
Sýretti túsirgen
Qanat SULTANǴAZIN