300-den astam otbasy ornalasqan Zagradovka eldi mekeninde turǵyndar úshin barlyq áleýmettik jaǵdaılar jasalǵan deýge bolady.
Tórt jyldan beri jumys istep turǵan qazandyq 65 baspanany jylýmen qamtamasyz etedi. 2016 jyly ashylǵan hokkeı korty balalar úshin naǵyz sport alańqaıyna aınalǵan. Syıymdylyǵy 10 myń tonnany quraıtyn astyq qabyldaý kásiporny germandyq qondyrǵylarmen jabdyqtalǵan.
Irgeli aýyldyń tynys-tirshiligimen tanysqan Parlament Májilisiniń depýtattaryna aıtar ótinish-tilekter az bolǵan joq. Máselen, «Prometeı Agro» JShS-niń dırektory Iýrıı Shol Aýyl sharýashylyǵy mınıstrliginiń tuqym sharýashylyǵy kartasyna engizilgen 10 jyldan astam ýaqyttan beri qoldanylyp kele jatqan tuqymdar sorttaryn sýbsıdııalamaý týraly usynysymen kelispeıtinin jetkizdi. О́ńirlerdiń klımaty, topyraq qunarlylyǵy árqıly keletindikten, jergilikti jaǵdaıdy jete eskergen jón. Teriskeıdiń qatal aýa raıyna aýdandastyrylǵan sorttar kóp jyl boıy jaqsy ónim berip keledi. Bir sortty jersindirý kóp ýaqytty qajet etedi, dedi aýyl sharýashylyq mamany. Halyq qalaýlysy Sergeı Zvolskıı karta maqsaty astyq shyǵymdylyǵyn arttyrýdy kózdeıtinin, naqty sheshim áli qabyldanbaǵanyn, bul bastamany agrarshylar qoldap otyrmaǵanyn aıtty.
Agroqurylym jetekshilerimen ótken kezdesýde eginshilik salasyndaǵy túıtkilder jan-jaqty sóz etildi. Elimizde traktorlardyń 46, kombaındardyń 70 paıyzy eskirgen.Mınıstrliktiń tehnıkalyq jańǵyrtýǵa arnalǵan kartasynda ınvest sýbsıdııalar arqyly mashına-traktor parkin jańalaýdyń jeńildikti joldary qarastyrylǵan. Kókshetaý mashına jasaý zaýytynda «Akros» kombaındaryn qurastyryp, otandyq tehnıkalarǵa basymdyq beriletin bolady.
Májilismen Vladıslav Kosarevtyń aıtýynsha qosalqy sharýashylyqtar kooperatıv quramyna ense, utary mol bolmaq. Jınalǵan ónimdi birigip ótkizýge, sanyn da, sapasyn da kóbeıtýge múmkindikter týdyrylady. Aýyldyqtar jumyspen qamtylady. О́ndiris oshaqtary qurylady.
Kadr tapshylyǵyna baılanysty saýalǵa Májilis depýtaty Iýrıı Tımoshenko bylaı dep jaýap berdi: «Elimizde tegin kásiptik-tehnıkalyq bilim berý baǵdarlamasy qabyldanǵan. Jobaǵa qatysý arqyly jumysshy mamandyǵyn alam deýshilerge jol ashyq. Bul oraıda jumys berýshiler mamandardyń áleýmettik máselelerin sheshýge múddeli bolýlary tıis.
Parlament Májilisiniń depýtattary jurtshylyqtyń ótinish-tilekterin zeıin qoıa tyńdap, tıisti oryndarǵa jetkizýge ýaǵdalasty.
О́mir Esqalı,
«Egemen Qazaqstan».
Soltústik Qazaqstan oblysy
Esil aýdany