Baılanys qyzmetin kórsetý erejesine jańa ózgertýler engizilýine baılanysty ózekti máseleler sheshiletin boldy. Bul týraly Aqparat jáne kommýnıkasııalar mınıstri Dáýren Abaev Facebook paraqshasynda habarlady.
«Bizdiń mınıstrlik Baılanys qyzmetin kórsetý erejesine jańa ózgertýler engizedi. Bul ózgertýler uıaly baılanys abonentteri kópten beri aıtyp júrgen birqatar problemany sheshýge baǵyttalyp otyr.
Qandaı keleńsizdikter joıylatynyna tómende birqatar mysal keltirilgen.
Jańa ereje baılanys operatorlaryna jeke shotta qarajat bolmaǵan jaǵdaıda qyzmet kórsetýge tosqaýyl qoıyp otyr. Bul - negizinen roýmıng qyzmetine qatysty. Osylaısha, biz abonenttik nomerdiń «mınýs» bolýynyń, ıaǵnı qaryz bolyp qalýynyń aldyn alamyz.
Sondaı-aq, budan bylaı aýystyrylǵan nomerge qońyraý shalý kezinde «beep» qosý sıgnalyn erikten tys ornatý praktıkasy joıylady. Endi shaqyrý sıgnalynyń aldynda qosymsha akýstıkalyq sıgnaldar men paýzalardy ornatý abonenttiń ótinishimen ǵana iske asady.
Sonymen qatar, abonentke ussd komanda nemese sms jiberýdi engizý arqyly qosymsha baılanys qyzmetterin tańý problemasy da sheshildi. Endi klavıshti qatelesip basý, kezdeısoq habarlama jiberý nemese basqa da baıqaýsyzda bolǵan áreketter saldarynan qajetsiz qyzmetterge qosylyp ketpeısiz.
Jaqyn ýaqytta qujattyń tolyq mátini BAQ-ta jarııalanady, osydan keıin 10 kúnnen soń ol kúshine enedi», delingen habarlamada.