«Astana EKSPO-2017» UK» AQ-nyń jalǵyz aksıoneri bolyp tabylatyn QR Ulttyq ekonomıka mınıstrliginiń sheshimimen Erbol Shormanov Ulttyq kompanııanyń basqarma tóraǵasy bolyp taǵaıyndaldy, dep habarlaıdy kompanııanyń baspasóz qyzmeti.
Búgin Ulttyq ekonomıka mınıstri Tımýr Súleımenov ulttyq kompanııa ujymyna jańa basshyny tanystyryp, aldaǵy jumystyń baǵyt-baǵdaryna toqtalyp ótti.
«Memleket basshysy N.Nazarbaevtyń tapsyrmasyna sáıkes, «Astana EKSPO-2017» UK» AQ aldaǵy ýaqytta óz jumysyn jalǵastyryp, jaýapkershiligi mol mindettemelerdi júzege asyratyn bolady. Bıyl sıfrlyq Qazaqstan baǵytyndaǵy mańyzdy elementterdiń biri - «Astana» halyqaralyq qarjy ortalyǵy jáne IT-startaptar tehnoparki óz jumysyn bastaýy tıis», - dedi mınıstr.
E.Shormanov 2015 jylǵy 20 tamyzdan bastap «Astana EKSPO-2017» UK» AQ basqarma tóraǵasynyń orynbasary, keıin basqarma tóraǵasynyń mindetin atqarýshy qyzmetin atqardy.
Aıta keteıik, Shormanov Erbol Álimqululy 1968 jylǵy 20 tamyzda dúnıege kelgen. Ol Almaty halyq sharýashylyǵy ınstıtýtyn támamdaǵan. Erbol Shormanov eńbek jolyn 1991 jyly QR Keden organdarynda bastap, 2005 jylǵa deıin qyzmet etti.
Ulttyq kompanııaǵa deıin, Almaty qalasy ákiminiń orynbasary laýazymynda shahardaǵy turǵyn úı-kommýnaldyq sharýashylyǵy, abattandyrý, ekologııa, energetıka, ónerkásip, saýda, shaǵyn bıznes, sanıtarlyq-epıdemııalogııalyq ahýal máselelerin qadaǵalady. Sondaı-aq, Almaty qalasy ákimi apparatyna, Kásipkerlik jáne ónerkásip departamentine jetekshilik etti.