Jergilikti jurt «Boına» atap ketken aýdanda Shalqar qalasynyń jas turǵyndary qazaqy ıt –tóbettiń músinin qardan jasady.
Onyń biri turǵan kúıinde beınelense, ekinshisi jatqan qalpynda somdalǵan. Qardan turǵyzylsa da kádimgi músin ónerimen týystas, ári enshiles týyndylardyń shynaıylyǵy men tóbetterdiń tirliktegi turqyna birshama jaqyndyǵy ony kórip tamashalaǵan jandardy tań-tamasha qaldyryp otyr. Itterdiń músinderin jasaý kezinde ony qatyrý úshin sý jáne tústerin tabıǵı túrge keltirýge qajetti aerozoldi boıaý qoldanylǵan. Osy ıdeıanyń avtory Q.Jubanov atyndaǵy Aqtóbe óńirlik memlekettik ýnıversıtetiniń beıneleý óneri jáne syzý fakýltetiniń 4-kýrs stýdenti Abylaıhan Amanjol músindi jasaýǵa eki kún ýaqyt ketkenin aıtyp berdi. Onyń aıtýynsha shyǵarmashylyqpen úndes bul erekshe iske qolynyń sheberligi bar aýyl turǵyny Aslan Tóretaev pen mekteptegi músin jáne beıneleý ónerine beıimi bar joǵary synyp oqýshylary súbeli úles qosypty.
Qardan jasalǵan músinderdegi turǵan kúıinde keskindelgen tóbettiń bıiktigi tórt metrdi quraıdy.
Temir QUSAIYN, «Egemen Qazaqstan»
Aqtóbe oblysy,
Shalqar aýdany