Parlament Senatynyń depýtaty Edil Mamytbekov Astana qalalyq máslıhatynyń depýtattarymen salyq jáne ákimshilendirýlerin jetildirý máselelerin talqylady.
Qazirgi kezde Qazaqstanda salyq pen túrli tólemderdiń 30-dan astam túri bar. E. Mamytbekovtiń aıtýynsha, otandyq salyq kodeksi asa aýqymdy ári basqa memleketterdiń salyq zańnamasymen salystyrǵanda túsiniksizdeý. Osyǵan baılanysty senator aımaqtar men qalalardyń múmkindikterin eskere otyryp, salyq salý deńgeıin tómendetý jaıynda aıtty jáne salyq ákimshilendirýlerin ońaılatý qajettigin atap ótti.
E. Mamytbekov másele salyqtardyń sanyn azaıtýda emes, korporatıvtik tabys salyǵy men qosymsha qun salyǵyn aralastyryp qoldaný arqyly sheshiledi, dep sanaıdy. Onyń pikirinshe, salyq salý bıznesti yntalandyrýy tıis.
Keden qyzmetiniń jumysyn jańǵyrtýdyń keleshegi de talqylandy. E. Mamytbekov jańa keden kodeksiniń kúshine enýine oraı erkin ekonomıkalyq aımaqtardyń beıimdelýi úshin keden organdary tıisti nusqaýlar ázirleý qajettigine nazar aýdardy. Depýtat taýarlardy rásimdeý merzimin táýlikten tórt saǵatqa deıin qysqartýǵa keden organdary ázir bolýǵa tıis ekenin atap ótti.
Júzdesý barysynda elordanyń áleýmettik-ekonomıkalyq ómiri týraly basqa da máseleler kóterildi. Atap aıtqanda, máslıhat depýtaty Záýre Júsipova balalardy mektepke deıingi mekemelerde oqytý jáne tárbıeleý jumystaryn memlekettik tilde júrgizýdi engizý týraly usynys aıtty. Kezdesý qorytyndysy boıynsha bul bastamany respýblıka deńgeıindegi qoǵamdyq talqylaýǵa shyǵarý usynyldy.