Aýdan ortalyǵy Áıteke bı kentinde 150 oryndyq ortalyq aýdandyq aýrýhana paıdalanýǵa berildi.
Qyzylorda oblysynyń ákimi Q. Kósherbaev jańa emdeý mekemesiniń ashylý saltanatyna qatysyp, dárigerler men kent turǵyndaryn jańa aýrýhananyń ashylýymen quttyqtady.
«Qazirgi tańda Elbasy Nursultan Ábishuly Nazarbaevtyń salıqaly saıasatynyń arqasynda elimizdiń densaýlyq saqtaý salasy júıeli túrde damýda, Qazaqstannyń túkpir-túkipirinde ozyq tehnologııalarmen jabdyqtalǵan jańa medısınalyq mekemeler ashylýda. Búgin, mine, 150 oryndyq aýrýhana ashyldy. Budan bólek, bıyl osy aýrýhana janynan 250 oryndyq emhana salýdy kózdep otyrmyz. Qazir emhana qurylysyn salý boıynsha qujattary ázirlenýde», - dedi oblys ákimi.
Aımaq basshysy aýrýhana ujymynyń jumysyna sáttilik tilep, jańa «Jedel járdem» kóliginiń kiltin tabystady.
Sondaı-aq, aýrýhana úshin quny 400 mln. teńge turatyn angıograf medısınalyq qondyrǵysy memlekettik-jekemenshik áriptestik aıasynda alynýda. Bul qondyrǵy jedel jáne sapaly ota jasaýǵa septigin tıgizip, Qazaly, Qarmaqshy, Aral aýdandary men Baıqońyr qalasynyń turǵyndaryna qyzmet kórsetetin bolady
Aýdandyq aýrýhananyń ashylýyna qatysqan QR Parlamenti Májilisiniń depýtattary Baqtyqoja Izmuhambetov, Abaı Tasbolatov, Muhtar Erman jáne Gennadıı Shıpovskıh pen aýdandyq densaýlyq saqtaý salasynyń ardageri Oraq Keýbasov qazalylyqtardy qýanyshtarymen quttyqtady.
Sondaı-aq, oblys ákimi aýdandyq sot jańa ǵımaratynyń ashylýyna qatysty. Ǵımarat ishinde sýdıa men hatshylardyń keńseleri, sot májilisi zaldary men muraǵat, keńse jáne qyzmettik bólmeler ornalasqan.
Tústen keıin aımaq basshysy Áıteke bı kenti men Qazaly qalasynyń 2018 jylǵy damý jospary máseleleri boıynsha jıyn ótkizip, jergilikti qoǵamdastyq ókilderimen kezdesip, aýdan jáne oblystyń ózekti máselelerin talqylady.
Málimet úshin: sońǵy 5 jylda Qyzylorda oblysynda 57 medısınalyq nysan, onyń ishinde Aral, Qazaly jáne Shıeli aýdandaryndaǵy ortalyq aýrýhanalar ashyldy. 2018 jylynyń qańtar aıynan bastap Baıqońyr qalasynda 15 myń qazaqstandyqqa qyzmet kórsetetin emhana jumysyn bastady.
Sonymen qatar, aldaǵy 3 jylda taǵy da 100 densaýlyq saqtaý nysany salynbaq. Odan bólek, 2015 jyly medısınalyq nysandardyń jabdyqtalý kórsetkishi 43 paıyz bolsa, 2017 jyly 76,5 paıyzdy qurady, al aǵymdaǵy jyly 90 paıyzǵa jetedi dep josparlanýda.