Reseıden keletin arzan astyq tasymalyn aýyzdyqtaý úshin shekaralas aımaqtarda jedel toptar men shtabtar uıymdastyrylyp, táýlik boıy kezekshlik etedi.
Jańa jyl aldynda Premer-mınıstrdiń orynbasary tóraǵalyq etken otyrysta astyq naryǵynda baǵany turaqtandyrý máselesi arnaıy qaralyp, birqatar sheshim qabyldanǵan bolatyn. Byltyr kórshi elde egin óte bitik shyǵyp, astyq baǵasy kúrt quldyrady. Qyzyljar óńiri Omby, Qorǵan sekildi astyqty oblystarmen shektesetin bolǵandyqtan, jasyryn jolmen jetkizilgen bıdaı óniminiń kólemi kúrt ósip, jergilikti agrarshylar tyǵyryqqa tirelgen edi. О́ıtkeni, Qazaqstanda joǵary surypty bir tonna bıdaıdy satyp alý baǵasy 42 myń teńgege belgilengenmen, shekaranyń arǵy jaǵynda 7-10 myń teńge arzan.
«Zańsyz jolmen astyq ákelýge árekettengen 10 tirkemeli kólik toqtatylyp, jarty mıllıon teńge aıyppul salyndy. Mamlıýt aýdany aýmaǵynda ornalasqan «Jańjol» keden beketi arqyly 215 tonna bıdaıdy alyp ótpek bolǵandardyń joly kesildi. «Azyq-túlik» kelisim-shart korporasııasy mindettegen mólsherde satyp alǵansha qyraǵylyqty bir sát te báseńdetpeımiz», deıdi oblystyq aýmaqtyq ınspeksııasy basshysynyń mindetin atqarýshy Vladımır Otradnyh.
Soltústikqazaqstandyq dıqandar qazirgi kúni 381 myń tonna astyqty syrtqa saýdalap úlgirdi.
О́mir ESQALI, «Egemen Qazaqstan»