Rýhanı jańǵyrý baǵdarlamasy aıasynda Batys Qazaqstan oblysynyń mádenıet salasynda 2018 jyly biraz is-shara josparlanǵan. Sonyń biri – Qazaqstannyń jalpyulttyq kıeli nysany qataryna kirgen Ǵumar Qarash zıraty ornyna kesene ornatylmaq. Bul jóninde óńirdegi mádenıet, arhıvter jáne qujattama basqarmasynyń basshysy Qadyrbolat Musaǵalıev habarlady.
Sala basshysynyń aıtýynsha, ótken jyl ishinde óńirde «Týǵan jer – týǵan el» baǵdarlamasy boıynsha - 66 shara, «Qasıetti Qazaqstan» jobasy boıynsha – 25 shara uıymdastyrylǵan. Al «Týǵan jer – týǵan el» baǵyty boıynsha 2017 jyly jalpy kólemi 57675,0 myń teńgeni quraıtyn 21 shara ótkizilgen. Munyń ishinde 16 jeltoqsan kúni Oral qalasynda ashylǵan «Rýhanı jańǵyrý» mýzeıin atap aıtýǵa bolady. Bul jobanyń quny - 40 mln. teńgeni quraǵan. Al Syrym aýdanyndaǵy Alash mýzeıi 22 mln.914 myń teńgege kúrdeli jóndeýden ótip, ekspozısııasy jańartyldy.
Qadyrbolat Musaǵalıev bolashaqta aýyl kitaphanalary mádenı, aǵartý jáne oıyn-saýyq ortalyqtaryna aınalatynyn, bul baǵyttaǵy jańǵyrtý jumysy aýdan ákimdikterimen birlese júrip jatqanyn aıtty.
Sondaı-aq «Ishki týrızm» baǵyty boıynsha oblysta vırtýaldy týrlar jáne oblys ishindegi baǵyttar boıynsha joryqtar uıymdastyrylmaq, bul maqsatqa - 12 mln. teńge qarastyrylǵan.
Aıta keteıik, Batys Qazaqstan oblysynda Qazaqstannyń makrosakraldy obektiler tizimine 6 nysan, atap aıtsaq – ortaǵasyrlyq Jaıyq qalashyǵy, Taqsaı obalar kesheni, Bókeıordasy tarıhı mýzeı kesheni, Alash mýzeıi, Jumaǵazy hazret kesenesi jáne Ǵumar Qarash zıraty kirgen bolatyn. 1921 jyly 21 sáýirde 45 jasynda qaskóıler qolynan qaza tapqan aǵartýshy aqynǵa arnalǵan shaǵyn qorshaý men belgi qazirgi Jánibek aýdany Borsy aýylynan 10 shaqyrym jerdegi Qarash kóli mekeninde ornalasqan.
Qazbek QUTTYMURATULY, «Egemen Qazaqstan»