Memleket basshysy kólik-logıstıka ınfraqurylymynyń tıimdiligin arttyrýdy tapsyrdy.
«Búginde Qazaqstan arqyly birneshe transkontınentaldy korıdor ótedi. Bul týraly kóp aıtyldy. Jalpy, Qazaqstan arqyly ótken júk tranzıti 2017 jyly 17 prosentke ósip, 17 mıllıon tonnaǵa jýyqtady. Tranzıtten túsetin jyl saıynǵy tabysty 2020 jyly 5 mıllıard dollarǵa jetkizý mindeti tur. Bul ınfraqurylymǵa jumsalǵan memleket qarajatyn tez arada qaıtarýǵa múmkindik beredi», dedi Elbasy.
Ol júk qozǵalysyn onlaın rejiminde baqylap, olardyń kedergisiz tasymaldanýy úshin jáne kedendik operasııalardy jeńildetý maqsatymen blokcheın sııaqty sıfrlyq tehnologııalardyń aýqymdy túrde engizilýin qamtamasyz etý qajet ekenin atap ótti.
«Zamanaýı sheshimder logıstıkanyń barlyq býynynyń ózara baılanysyn uıymdastyrýǵa múmkindik beredi. «Úlken derekterdi» (Big data) paıdalaný sapaly taldaýdy qamtamasyz etýge, ósimniń rezervin anyqtaýǵa jáne artyq shyǵyndy azaıtýǵa jaǵdaı týǵyzady. Osy maqsattar úshin Intellektýaldy kólik júıesin engizý qajet. Bul júıe kólik aǵynyn tıimdi basqarýǵa jáne ınfraqurylymdy odan ári damytý qajettigin anyqtaýǵa jol ashady», delingen Joldaýda.
Elbasy ishki óńirlik qatynastardy jaqsartý úshin avtojoldardyń jergilikti jelisin jóndeý men qaıta salýǵa arnalǵan qarjy kólemin kóbeıtý kerektigin tapsyrdy.
«Osyǵan jyl saıyn bólinetin bıýdjet qarajatynyń jalpy kólemin ortasha merzimdegi kezeńde 150 mıllıard teńgege jetkizý qajet. Bul jumysqa óńirlerdegi barlyq ákimdikterdiń belsendi qatysýyn qamtamasyz etý kerek», dep atap ótti Nursultan Nazarbaev.