Elbasy Nursultan Nazarbaev Qazaqstan halqyna Joldaýynda qurylysqa jáne kommýnaldyq sektorǵa zamanaýı tehnologııalardy engizý qajettigin atap ótti.
«Júzege asyrylyp jatqan baǵdarlamalar arqasynda Qazaqstanda paıdalanýǵa berilgen turǵyn úılerdiń kólemi jylyna 10 mıllıon sharshy metrden asty. Turǵyn úıdi kópshilikke qoljetimdi etken turǵyn úı jınaqtaý júıesi tıimdi jumys isteýde. Baspanamen qamtý kórsetkishi sońǵy 10 jylda bir turǵynǵa shaqqanda 30 prosentke ósip, búginde 21,6 sharshy metrdi qurady. Bul kórsetkishti 2030 jyly 30 sharshy metrge deıin jetkizý kerek», dedi Nursultan Nazarbaev.
Memleket basshysy osy mindetti oryndaý barysynda qurylys salýdyń jańa ádisterin, zamanaýı materıaldardy, sondaı-aq ǵımarattardyń jobasy men qala qurylysynyń josparyn jasaǵanda múlde basqa tásilderdi qoldanýdy tapsyrdy.
«Ǵımarattardyń sapasyna, ekologııalyq tazalyǵyna jáne energııalyq tıimdiligine joǵary talap qoıý qajet. Salynatyn jáne salynǵan úıler men ınfraqurylymdyq nysandardy ıntellektýaldy basqarý júıelerimen jabdyqtaý kerek. Bul turǵyndarǵa qolaıly jaǵdaı jasap, elektr energııasyn, jylý men sýdy tutynýdy qysqartyp, tabıǵı monopolısterdi tıimdi jumysqa yntalandyrady», dedi Nursultan Nazarbaev.
Ol sondaı-aq, zańnamaǵa, sonyń ishinde tabıǵı monopolııalar salasyn retteıtin zańdarǵa tıisti ózgerister engizý qajet ekenin aıtty.
«Ákimder turǵyn úı-kommýnaldyq ınfraqurylymyn jetildirý máselesin memleket-jekemenshik seriktestigi negizinde belsendi sheshýi kerek. Aýyldyq eldi mekenderdi sapaly aýyzsýmen qamtamasyz etý úshin Úkimet bul iske barlyq qarajat kózderinen jyl saıyn kem degende 100 mıllıard teńge qarastyrýy qajet», delingen Elbasy Joldaýynda.