Elbasy jyl saıynǵy Qazaqstan halqyna Joldaýynda qarjy sektoryn «qaıta jańǵyrtý» kerektigin kórsetti.
«Banktik portfelderdi «nashar» nesıeden aryltý isin aıaqtaý qajet. Ol úshin bank ıeleri shyǵyndaryn moıyndaı otyryp, ekonomıkalyq jaýapkershilik alýǵa tıis. Aksıonerlerdiń affılırlengen kompanııalar men jeke adamdardyń paıdasy úshin bankterden qarjy shyǵarýy aýyr qylmys bolyp sanalýǵa tıis. Ulttyq Bank mundaı isterge nemquraıly qaramaý kerek. Áıtpese, mundaı memlekettik organnyń ne keregi bar?» dedi Memleket basshysy.
Ulttyq Bank tarapynan qarjy ınstıtýttarynyń qyzmetin qadaǵalaý qatań, ýaqtyly ári nátıjeli bolýǵa tıis.
«Memleket qarapaıym azamattardyń múddelerin qorǵaýǵa odan ári kepildik beredi. Jeke tulǵalardyń bankrottyǵy týraly zań qabyldaýdy tezdetý qajet», dedi Nursultan Nazarbaev.
Elbasy 2016 jyldyń 1 qańtaryna deıin halyqqa berilgen valıýtalyq ıpotekalyq zaımdar jónindegi máseleni Ulttyq Bankke tolyǵymen sheshýdi tapsyrdy.
«Sol kúnnen bastap atalǵan valıýtalyq zaımdardy jeke tulǵalarǵa berýge zań júzinde tyıym salynǵan bolatyn. Ulttyq Bank pen Úkimet ekonomıka salalaryndaǵy naqty tıimdilikti esepke alatyn stavkalarmen bızneske uzaq merzimdi nesıelendirýdi qamtamasyz etý máselesin birlesip sheshýge tıis», dedi Memleket basshysy.
Ol ınvestısııalyq ahýaldyń odan ári jaqsarýy jáne qor naryǵynyń damýy mańyzdy bolyp sanalatynyn eske saldy.
«Bul – jumysyn bastaǵan «Astana» halyqaralyq qarjy ortalyǵynyń negizgi mindetteriniń biri. Ol halyqaralyq ozyq tájirıbeni paıdalanyp, aǵylshyn quqyǵy men zamanaýı qarjy tehnologııalaryn qoldanatyn óńirlik habqa aınalýǵa tıis. «Samuryq-Qazyna» ulttyq ál-aýqat qory» ulttyq kompanııalarynyń aksııalaryn IPO-ǵa tabysty túrde shyǵarý qor naryǵyn damytýǵa septigin tıgizedi», delingen Elbasynyń Qazaqstan halqyna Joldaýynda.