Memleket basshysy Qazaqstan halqyna Joldaýynda halyqtyń ómir súrý uzaqtyǵynyń ósýine jáne medısınalyq tehnologııalardyń damýyna baılanysty medısınalyq qyzmet kórsetýge degen suranys kólemi arta túsetinin aıtyp ótti.
«Qazirgi densaýlyq saqtaý isi qymbatqa túsetin stasıonarlyq emge emes, negizinen aýrýdyń aldyn alýǵa baǵyttalýǵa tıis. Salamatty ómir saltyn nasıhattaı otyryp, qoǵamdyq densaýlyqty basqarý isin kúsheıtý kerek. Jastardyń reprodýktıvti densaýlyǵyn qorǵaýǵa jáne nyǵaıtýǵa erekshe nazar aýdarý kerek», dedi Elbasy.
Ol tıimdiligi az jáne memleket úshin shyǵyny kóp dıspanserlik em qoldanýdan negizgi sozylmaly aýrýlarǵa alystan dıagnostıka jasap, sondaı-aq osy salany ambýlatorlyq emdeý arqyly basqarýǵa kóshý qajet ekenin aıtty. «Bul tájirıbe álemde burynnan bar. Ony batyl ári belsendi túrde engizý kerek», dedi Memleket basshysy.
Nursultan Nazarbaev onkologııalyq aýrýlarmen kúresý úshin keshendi jospar qabyldap, ǵylymı onkologııalyq ortalyq qurý qajettigin tapsyrdy. «Halyqaralyq ozyq tájirıbe negizinde aýrýdy erte dıagnostıkalaýdyń jáne qaterli isikti emdeýdiń joǵary tıimdiligi qamtamasyz etilýge tıis», dedi.
Memleket basshysy sondaı-aq, kardıologııa, bosandyrý jáne ókpe aýrýymen kúresý kezinde atqarǵan isterimiz sııaqty jumystardy da júrgizý kerektigin tapsyrdy.
«Densaýlyq saqtaý salasy halyqtyń, memlekettiń jáne jumys berýshiniń ortaq jaýapkershiligine negizdelgen Mindetti áleýmettik medısınalyq saqtandyrý júıesine kezeń-kezeńimen kóshetin bolady. Ony engizýdiń qajettiligi eshqandaı kúmán týǵyzbaıdy. Alaıda, Densaýlyq saqtaý mınıstrligi men Eńbek jáne halyqty áleýmettik qorǵaý mınıstrligi iske asyrmaǵan daıyndyq jumystaryn tyńǵylyqty júrgizý talap etiledi», dedi Nursultan Nazabaev.
Ol memlekettiń mindetterin naqty belgileı otyryp, Tegin medısınalyq kómektiń kepildik berilgen kóleminiń jańa modelin ázirleý qajettigin atap ótti. «Halyq memleket tarapynan kepildik berilmegen qyzmetterdi Mindetti áleýmettik medısınalyq saqtandyrý júıesiniń qatysýshysy retinde nemese erikti medısınalyq saqtandyrý, sondaı-aq birlese tóleý arqyly ala alady», dedi.
Sonymen qatar, aqparattyq júıelerdi biriktirý, mobıldik sıfrlyq qosymshalardy qoldaný, elektrondyq densaýlyq pasportyn engizý, «qaǵaz qoldanbaıtyn aýrýhanaǵa» kóshý arqyly medısınalyq kómektiń qoljetimdiligi men tıimdiligin arttyrý qajettigin tapsyrdy.
«Medısınada aýrýlardy dıagnostıkalaý men emdeýdiń tıimdiligin aıtarlyqtaı arttyratyn genetıkalyq taldaý men jasandy ıntellekt tehnologııalaryn engizýge kirisýimiz kerek. Medısınalyq kadrlarmen qamtamasyz etý jáne olardy sapaly daıarlaý mańyzdy másele bolyp sanalady. Búginde bizde Nazarbaev Ýnıversıtetiniń biregeı Medısına mektebi bar. Onda biriktirilgen ýnıversıtet klınıkasy jumys isteıdi. Bul tájirıbe barlyq medısınalyq joǵary oqý oryndaryna taratylýǵa tıis», dedi Memleket basshysy.
Elbasy osy jáne basqa da sharalardy iske asyrý úshin «Halyq densaýlyǵy jáne densaýlyq saqtaý júıesi týraly» kodekstiń jańa redaksııasyn ázirleýdi qajettigin atap ótti.