Taıaýda kómir salasynyń ardageri, Qaraǵandy oblysy, Qaraǵandy, Saran jáne Shahtınsk qalalarynyń qurmetti azamaty, Qaraǵandy memlekettik tehnıkalyq ýnıversıtetiniń professory Nıkolaı Aleksandrovıch Drıjd 90 jasqa toldy. Mereıtoı ıesine QarMTÝ Ǵylymı keńesiniń keńeıtilgen otyrysynda qurmet kórsetildi. Qaraǵandy kómir basseıniniń patrıarhyn oblys ákimi Erlan Qoshanov, áriptesteri, aımaqtyń ónerkásip kásiporyndarynyń jetekshileri, oblys pen qala jurtshylyǵynyń ókilderi quttyqtady. Mereıtoı qurmetine Nıkolaı Drıjd Prezıdenttiń Alǵys hatyn aldy. Elbasy quttyqtaýyn aımaq basshysy oqyp berdi.
Hatta «Elimizdiń kómir óndirisindegi kóp jylǵy eńbegińiz úshin alǵys aıtamyn. Sizdiń ómir jolyńyz – bul adaldyq, mindet pen kásibıliktiń naǵyz úlgisi. Siz salanyń áleýmettik-ekonomıkalyq damýyna úlken úles qostyńyz. Búginde bilimińiz, tájirıbeńiz ben danalyǵyńyz Qaraǵandy kenshileriniń dástúrin jalǵastyrýshy jas urpaqty tárbıeleýde paıdasyn tıgizýde», delingen.
Sonymen qatar oblys ákimi Memleket basshysynyń atynan mereıtoı ıesine altyn belgini tabystady. Alqaly jıynda elimizdiń damýyna zor úlesin qosqan ardagerdiń eseli eńbegi aıtyldy. О́z zamandastary ony «ken óneriniń generalyna» teńeıtindigin jetkizdi. Olar Nıkolaı Drıdjdiń ómirbaıanyndaǵy eń jarqyn kezeń Qazaqstannyń «qara injýi» – Shubarkól kómir razrezi ekenin de atap ótti.
Búginde ýnıversıtette professor Drıjd qurǵan «Ken metallýrgııa kesheniniń metan energetıkasy» zerthanasy jumys istep turǵanyn aıta keteıik. Zerthana tanymal álemdik óndirýshilerdiń jabdyqtarymen jabdyqtalǵan.
Nıkolaı Drıjd salalyq «Qaraǵandy kómir» birlestiginde bólimshe basshysynan atqarýshy dırektor qyzmetine deıin jetti. Ol kenshilerdiń birneshe býynyn daıarlady, olardyń arasynda búgingi shahta jetekshileri de bar. Jasyna qaramastan, professor oqytýshylyq qyzmetin jalǵastyrýda.
Nıkolaı Drıjd – Jaratylystaný ǵylymynyń, Qazaqstan ulttyq akademııasynyń, Reseı taý-ken ǵylymy akademııasynyń akademıgi. KSRO Memlekettik syılyǵynyń eki márte laýreaty, Lenın ordeniniń eki márte, Eńbek Qyzyl Tý ordeniniń ıegeri. «Dostyq», «Qurmet» jáne Ahmet Baıtursynov atyndaǵy ordendermen marapattalǵan. «Kenshi dańqy» belgisiniń tolyq ıegeri.
Mıras ASAN, «Egemen Qazaqstan»
Qaraǵandy oblysy