Atyraý oblysynda halyq batyry Mahambet О́temisulyna arnalǵan eskertkish boı kóterdi. Batyr esimimen atalatyn Mahambet aýdanynyń ortalyǵynan eskertkishtiń ashylý saltanatyna oblys ákiminiń orynbasary Álibek Náýtıev qatysyp, Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda jasalǵan ıgi istiń mańyzy jaıly aıtty.
Al aýdan ákimi Syrym Rysqalıev «Eli úshin er bolyp týǵan Isataı men Mahambet esimderi kúlli qazaq halqy úshin qasterli de qurmetti. О́shkenimiz janyp, rýhanı janymyzdyń shamyn qaıta mazdatqan jańǵyrý kezeńinde ulylarymyzdy qasterleý – qasıetti boryshymyz. Batyr atymen atalatyn aýdan ortalyǵynda baba eskertkishiniń joqtyǵy barsha jurtshylyqtyń kóńiline qaıaý túsirip kelgen edi. Mine, batyr babamyz alyp eskertkish bolyp ortamyzǵa oraldy. Mahambet О́temisulyna arnalǵan bul eńseli eskertkish rýhymyzdy oıatatyn, uly murattarǵa jeteleıtin, eljandylyqqa, otanshyldyqqa úndeıtin qasterli de qasıetti orynǵa aınalatynyna senemiz», dedi.
Saltanatty jıynda batyrdyń tórtinshi urpaǵy Baǵyt Ǵabdýllın, oblystyq qoǵamdyq qaýymdastyq tóraǵasy Murat Saqtaıuly, Qazaqstan Jazýshylar odaǵy Atyraý oblystyq fılıalynyń tóraǵasy, halyqaralyq «Alash» syılyǵynyń ıegeri, aqyn Qoıshyǵul Jylqyshıevter sóz aldy.
Eskertkishtiń avtory – músinshi, Qazaqstan Sýretshiler odaǵynyń múshesi Serik Mátenııazov. «Batys Alıans stroı» mekemesiniń basshysy Ádil Jubanov tuǵyryn ornatty. Eskertkishtiń jalpy bıiktigi – 10 metr 80 sm. Qoladan quıylyp, tuǵyry temir-betonmen jasalyp, granıtpen qaptalǵan.
Baqytgúl BABASh, «Egemen Qazaqstan»
ATYRAÝ