Senat depýtattary Mıhaıl Bortnık, Dýlat Qusdáýletov jáne Baqtybaı Shelpekov Mańǵystaý oblysynyń ákimi Eraly Toǵjanovpen kezdesýde aımaqtyń 2017 jylǵy áleýmettik-ekonomıkalyq damý nátıjeleri talqylandy.
E. Toǵjanov depýtattarǵa óndiristik, kóliktik jáne ınfraqurylymdyq iri jobalardy iske asyrý barysy týraly áńgimeledi. Atap aıtqanda, Quryq portynyń qýaty eleýli túrde ulǵaıdy, jylyna 2 mıllıon tonna júk tasymalyna eseptelgen jańa parom kesheni iske qosyldy. Ishki týrızmdi damytý maqsatynda «Ata joly» avtomobıl jolyn jańǵyrtý jumystary bastaldy.
Depýtattardyń ótinishi boıynsha aımaq basshysy «Qoshqar Ata» qaldyq saqtaý qoımasynyń topyraq qunaryn qalpyna keltirý jumystary jáne Basqudyq aýylynyń aýmaǵyndaǵy 8,2 gektar alańdy quraıtyn jasyl aımaq qalyptastyrý týraly aıtty. Bul aımaqtyń tabıǵatyn turaqtandyrýǵa jáne ekologııalyq jáne sanıtarlyq-gıgıenalyq jaǵdaıyn jaqsartýǵa múmkindik beredi.
Senatorlar Mańǵystaý oblystyq prokýratýrasynda ótken keńeste konstıtýsııalyq reformalar men zańnamadaǵy ózgeristerdi iske asyrý jaıyn da talqylady. M. Bortnık, D. Qusdáýletov jáne B. Shelpekov qylmystyq jáne ákimshilik zańnamasyn izgilendirý jónindegi Parlamenttiń jumysy týraly áńgimelep berdi. Shara barysynda bıznes qaýymdastyqtary men logıstıkany jaqsartýǵa baılanysty máseleler de talqylandy.