Parlament Májilisi tóraǵasynyń orynbasary Vladımır Bojko Rýdnyı qalasynda bolyp, ondaǵy Qazaq armatýra-ızlıatorlyq zaýytynda boldy.
Bul balamasy elimizde ǵana emes, Táýelsiz elder dostastyǵy keńistiginde joq birden bir zaýyt elektr energııasyn tasymaldaýǵa arnalǵan armatýra-ızolıatorlar qurastyrady. Izolıatorlardy daıyn túrde Reseıden ákeledi de, osynda qurastyrady. Zaýyttyń jumysyn bastaǵanyna da bes jyl endi tolady. Soǵan qarmastan, osy jyly óndiriske jańǵyrtý jumystary júrgiziledi. Zaýyt dırektorynyń orynbasary Tatıana Rybalkonyń aıtýynsha, óndiris sehy eki ese ulǵaıatyn bolady. Jańǵyrtý jumystary úshin shetelden 170 mıllıon teńge ınvestısııa tartylyp otyr.
«Aromatýra-ızolıatorlarǵa dúnıe júzinde suranys óte úlken. Sonymen qatar bizdiń zaýyt osylardy óndirip otyrǵan iri zaýyttarǵa báseke bolady. Qazir óndirgen ónimniń 70 paıyzy Qazaqstandy qamtamasyz etedi. Eksportqa ázirge Azerbaıjan men Reseıge shyǵara bastady. Aldaǵy jyldary Islam jáne Azııa damý bankteri qarjylandyratyn halyqaralyq naryqqa da shyǵatyn bolamyz, ol úshin attestasııadan sátti óttik. Qazir jylyna 500 myń armatýra-ızolıator óndiremiz, sehty keńeıtkennen keıin onyń sanyn 2 mıllıon danaǵa jetkizetin bolamyz» deıdi Tatıana Aleksandrovna.
Vladımır Bojko zaýyt jumysymen jete tanysty. Zaýyttyń eshqandaı nesıe almaı, ınvestısııa arqyly jańǵyrtý jumystaryn qolǵa alǵaly otyrǵanyna rızashylyq bildirdi.
«Qyzylordada zamanaýı shyny zaýyty jumys isteıtin bolady. Shyny ızolıatordy ózimizden shyǵaratyn bolsaq, ónimniń ózindik quny kemip, zaýyttyń tabysy artady» dedi Vladımır Karpovıch.
Munan keıin Parlament Májilisiniń depýtattary Vladımır Bojko, Vasılıı Oleınık, Aleksandr Sýslov «Nur Otan» partııasy Rýdnyı qalalyq fılıalynda partııa múshelerimen kezdesti. Onda depýtattar ótken jyly Májilis depýtattarynyń jasaǵan jumysyna sholý jasady, shyǵarylǵan zańdardyń mańyzyna toqtaldy. Kezdesýge qatysýshylardyń suraqtaryna jaýap berdi.
Názıra Járimbet,
«Egemen Qazaqstan»
Rýdnyı