Ońtústik Qazaqstan oblysynda balalarǵa arnalǵan eki birdeı nevrologııalyq ońaltý ortalyǵy ashyldy. Bul týraly OQO ákiminiń baspasóz qyzmeti habarlady.
Mundaı mekeme búginge deıin elimiz boıynsha tek Astana qalasynda ǵana bolyp kelse, endi Shymkentte de jumysyn bastady. Buǵan ásirese kezekte turyp, elordaǵa sabylyp sharshaıtyn ata-analar aıryqsha qýanýda. Qos ortalyqtyń jumysymen tanysqan Ońtústik Qazaqstan oblysynyń ákimi Janseıit Túımebaev mundaı mekemeler balalar arasyndaǵy múgedektikti tómendetetinine senim bildirdi.
«Oblysymyzda búginge deıin serebraldi paralıchi dıagnozy bar balalardy emdeıtin arnaıy mekeme bolmaǵan. Jalpy óńirimizde nevrologııalyq aýrýlarmen 3 jasqa deıingi 2 myńǵa jýyq bala esepte turady. Olar buǵan deıin reabılıtasııalyq em alý úshin Astana qalasyndaǵy ońaltý ortalyǵyna barýǵa májbúr edi. Bul naýqas balalardyń ata-analaryna aıtarlyqtaı qıyndyq týdyryp keldi. Osy máselelerdi taldaı kele, aýrý balalardy ýaqytyly, keshendi, júıeli reabılıtasııamen tolyq qamtýǵa baǵyttalǵan ortalyqtar ashý qajettiligi týyndady. Júıeli jumystardyń nátıjesinde búgin mine, eki birdeı mekeme paıdalanýǵa berilip otyr», - dedi Janseıit Qanseıituly.
Ortalyqtyń biri 3 jasqa deıingi búldirshinderge, al ekinshisi 15 jasqa deıingi nevrologııalyk aýrýlarmen aýyratyn jetkinshekterdi emdeıdi. 100 oryndyq qos ortalyq ta reabılıtasııalyq em alýǵa qajetti robottandyrylǵan «LOKOSTATION» qurylǵysymen jabdyqtalǵan. Bul apparat 4 jasar serebraldy paralıchimen aýyratyn balalarǵa qoldanylady. Qondyrǵyda jasalǵan jattyǵýlar júrýge qajetti barlyq bulshyq etter men mı qyrtysynyń durys qalyptasýyna kómektesip, naýqastyń tez ońalýyna yqpal jasaıdy. Árbir ortalyqta jylyna 3200 balany josparly túrde ońaltýdan ótkizýge múmkindik qarastyrylǵan.
Qos ortalyqtyń múmkindikterimen tanysqan óńir basshysy aldaǵy ýaqytta mekemeniń mamandaryn alys-jaqyn shet elderge jiberip, kásibı biliktiligin arttyrý josparlanyp otyrǵanyn jetkizdi. Osy bastamanyń negizinde jaqyn kúnderi Germanııadan halyqaralyq jattyqtyrýshylar kelip, qos ortalyqtyń mamandaryna naýqastyń tirek-qımyl qozǵalysyn qalpyna keltirý boıynsha semınar trenıngter ótkizbek.