Atyraýda «Qazgıdromet» fılıaly dırektorynyń orynbasary jymqyrǵan aqshany qaıtardy. Atyraý qalasynyń № 2 sotynda Qazaqstan Respýblıkasynyń Qylmystyq kodeksiniń 189-babynyń 3-bóliginiń 1-tarmaǵymen aıyptalǵan A.A.-ǵa qatysty qylmystyq is qaraldy, - dep habarlady sottyń baspasóz qyzmeti.
Sottalýshy A.A. «Qazgıdromet» RMK-nyń oblystyq fılıaly dırektorynyń orynbasary qyzmetin atqaryp júrip, 2017 jyldyń qazan aıynda fılıal dırektorynan qyzmettik qajettilikke baılanysty degen syltaýmen Kaspıı teńizi Mańǵystaý oblysy akvatorııasyna ekologııalyq monıtorıng júrgizý úshin issaparǵa ruqsat alady. Qaramaǵyndaǵy on qyzmetkermen birge on kúndik issaparǵa shyǵýy kerek bolady. Alaıda sottalýshynyń qylmystyq oıy týyndap, teńizge shyǵatyn kemege quıylǵan quny 2 016 000 teńgeniń 16 000 lıtr dızel otynyn óziniń tanysyna satyp jiberedi. Keıin issaparǵa barý qajettiligi joqtyǵyn aıtyp, qyzmetkerlerdiń issapar shyǵyndaryn ózi ıemdenip alady. Kóp uzamaı dál osy qylmystyq josparyn taǵy da iske asyrady. Nátıjesinde jábirlenýshige jalpy mólsheri 4 463 111 tenge kóleminde múliktik zalal keltirgen.
Sotqa deıingi tergeý barysynda sottalýshy qylmyspen keltirilgen múliktik zalaldy jábirlenýshi taraptyń paıdasyna tolyq ótep bergen. Sondaı-aq ol kináni moıyndaý týrasyndaǵy prosestik kelisim jasaýǵa erikti túrde nıet bildirip, prokýrormen prosestik kelisim jasaqtaǵan. Sot úkimimen prosestik kelisim bekitilip, sottalýshy A.A.-ǵa eki jyl merzimge shartty túrde bas bostandyǵyn aıyrý jazasy taǵaıyndaldy.
Baqytgúl BABASh,
«Egemen Qazaqstan».
ATYRAÝ.