Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýynda úzdik densaýlyq saqtaý isi jáne deni saý ult týraly aıtyldy. Búgingi tańda halyqtyń ómir súrý uzaqtyǵyn ulǵaıtý memleket úshin mańyzdy másele. Ol úshin medısınalyq tehnologııalardyń damýy jáne medısınalyq qyzmet kórsetýge degen suranys kólemi arta túsýi qajet. Bul jaıynda Prezıdent «Qazirgi densaýlyq saqtaý isi qymbatqa túsetin stasıonarlyq emge emes, negizinen aýrýdyń aldyn alýǵa baǵyttalýǵa tıis. Salamatty ómir saltyn nasıhattaı otyryp, qoǵamdyq densaýlyqty basqarý isin kúsheıtý kerek», dep naqty atap kórsetti.
Elimizdiń densaýlyq saqtaý salasynda álemde burynnan bar tájirıbeler qoldanylyp keledi. Endi sol tájirıbelerdi batyl ári belsendi túrde engizý kerektigin Elbasy óz Joldaýynda aıtty. Bul oraıda Taraz Ǵylymı-klınıkalyq kardıohırýrgııa jáne transplantologııa ortalyǵy tehnologııalardy damytý isin qolǵa alyp otyr. Sondaı-aq medısına salasynyń ǵylymı-zertteý jaǵyna kóp kóńil bólinip, birneshe doktorlyq dıssertasııalar qorǵaldy. Bul jerde júrek, búırek sekildi adam aǵzalaryn aýystyrý tájirıbesi de oń nátıje berýde.
Jalpy, medısına salasynda aldymyzda turǵan mindet kóp. Halyq árbir tájirıbeniń, jetistiktiń ıgiligin kórýi kerek. Sondyqtan halyqtyń ómir súrý uzaqtyǵyn arttyrýǵa da basa kóńil bólgen jón. Bul oraıda Elbasynyń «Biz kardıologııa, bosandyrý jáne ókpe aýrýymen kúresý kezinde atqarǵan isterimiz sııaqty jumystardy da júrgizýimiz kerek», degen sózin negizge ala otyryp, álemdegi ozyq tájirıbelerdi ózimizge engizýge bolady.
Búgingi tańda mindetti áleýmettik medısınalyq saqtandyrý júıesine kezeń-kezeńmen kóshý, tegin medısınalyq kómektiń kepildik berilgen kóleminiń jańa modelin qurý, «qaǵaz qoldanbaıtyn aýrýhanaǵa» kóshý arqyly medısınalyq kómektiń qoljetimdiligi men tıimdiligin arttyrý máseleleri medısına salasyna oń serpin berip qana qoımaı, halyqtyń densaýlyǵyn nyǵaıtýda jáne ómir súrý uzaqtyǵyn qamtamasyz etýde erekshe ról atqarady. Taǵy bir másele, Joldaýda jańa tehnologııalar arqyly medısınalyq tájirıbeler barlyq medısınalyq joǵary oqý oryndarynda taratylý kerektigi aıtyldy. Bul oraıda Elbasy Nazarbaev Ýnıversıtettiń biregeı medısına mektebiniń tájirıbesin qoldaný kerektigin kórsetti. Elbasy Joldaýy ónerkásip pen ǵylymdy ushtastyrý arqyly adamzat órkenıetine, ult densaýlyǵyna qyzmet isteýdi mindettep otyr.
Seıithan JOShYBAEV, «Taraz Ǵylymı-klınıkalyq kardıohırýrgııa jáne transplantologııa ortalyǵynyń» bas dırektory, medısına ǵylymdarynyń doktory, professor
Jambyl oblysy