Atyraý oblysynyń Qurmanǵazy aýdanyndaǵy Qıǵash ózeniniń boıynda ornalasqan aýyl halqynyń negizgi kásibi – balyq sharýashylyǵy. О́tken ǵasyrdyń alpysynshy jyldarynan beri aýdandaǵy Qıǵash, Shora ózenderiniń arnasyn tazartý, tereńdetý jumystary júrgizilgen joq. Bul óz kezeginde sý aıdynynyń taıyzdanýyna, balyq joldarynyń jabylýyna ákeldi.
Balyq qory da azaıyp ketti. Osy olqylyqtyń ornyn toltyrý úshin oblystyq ákimdik birqatar sharalar qabyldap, ózenniń gıdrogeologııalyq jaǵdaıyn jaqsartýǵa baǵyttalǵan ınvestısııalyq joba daıyndady. QR Parlament Senatynyń depýtaty Sársenbaı Eńsegenov qurmanǵazylyqtardyń janaıqaıyn joǵary jaqqa jetkizip, Qıǵash ózeni máselesi boıynsha Úkimet basshysyna depýtattyq saýal joldaǵany jaıly «Egemen Qazaqstan» gazetiniń betinde buryn da jazylǵan edi. Parlament Senaty men Májilisiniń depýtattary Sársenbaı Eńsegenov pen Baqytjan Ertaevtyń Qurmanǵazy aýdany jurtshylyǵymen kezdesýinde osy másele taǵy da talqyǵa tústi.
- Bıyl Qıǵash ózenin tereńdetip qazý jumystaryna 1 mlrd teńge qarjy bólindi. Bul jumys ýaqytyly ári sapaly júrgizilýi tıis, - dedi senator Sársenbaı Eńsegenov.
Eńbekshi selolyq okrýginiń ákimi Qanat Ǵabbasov qazylatyn 150 shaqyrymǵa Kobıakov arnasyn qossa, aýyl turǵyndary taza sýdan tarshylyq kórmes edi degen usynysyn aıtty.
Kezdesýde depýtattar Parlament qabyrǵasynda qabyldanǵan jańa zańdar, salyq, keden kodeksine engizilgen ózgeristerdiń aýyl-elde qanshalyqty júzege asyp jatqanyna da nazar aýdardy.
Baqytgúl BABASh,
«Egemen Qazaqstan».
ATYRAÝ.