Senat depýtattary óńirlerde birqatar kezdesýler ótkizdi, dep habarlady palatanyń baspasóz qyzmeti.
Buǵan deıin jumys saparymen Aqtoǵaı, Shet aýdandarynda bolǵan Parlament Senatynyń depýtaty Rysqalı Ábdikerov oblys ortalyǵyndaǵy eki mekemede kezdesý ótkizdi. Olardyń biri – oblystyq aýyl sharýashylyǵy basqarmasy bolsa, ekinshisi N.Nurmaqov atyndaǵy mamandandyrylǵan mektep-ınternatynda ustazdar qaýymymen júzdesti.
Senator aýyl sharýashylyǵy salasynyń mamandaryna Elbasynyń Joldaýynan týyndaıtyn negizgi máselelerdi túsindirdi. Aýyl sharýashylyǵy basqarmasyndaǵy kezdesýde depýtat Shet aýdanyndaǵy Aqadyr kentinen ári ornalasqan bir sharýa qojalyǵynda elektr jaryǵyn tutyna almaı otyrǵanyn aıta kelip, elektr jelisin júrgizý múmkindikterine nazar aýdardy. Senatordyń pikirinshe, mundaı jerlerde tek balama energııany qoldaný kerek. Halyq qalaýlysy aýyl sharýashylyǵy salasynyń mamandaryna búgingi tańda sharýa qojalyqtaryna áli de kóp nárse jetispeı otyrǵanyn aıta kelip, ózekti máselelerdi sheshý qajettigin atap ótti.
Depýtat R.Ábdikerov aýyl sharýashylyǵy mamandaryna Elbasynyń Joldaýynda kórsetilgen agroónerkásip keshenin qarqyndy damytýda aqyldy tehnologııalardy paıdalaný máselesine toqtaldy. Ásirese, egilgen tuqymdy kóp qarajat jumsamaı jınaý jáne tehnıkalar men tyńaıtqyshtardy tıimdi qoldana bilý qajettigi aıtyldy. «Osyndaı jańa tehnologııalardy ıgergen saıyn kóptegen adamdar jumyssyz qala bastaıdy. Sondyqtan olardy der kezinde zaman talabyna saı tehnıka tetigin meńgerýge oqytý men qaıta daıarlyqtan ótkizý de Joldaýdan týyndaıtyn mindetter», dedi depýtat.
Qaraǵandy oblysy tabıǵı resýrstar jáne tabıǵat paıdalanýdy retteý basqarmasynyń basshysy Rýslan Tólepbaev qorshaǵan ortany lastaıtyn birinshi sanatty kásiporyndar ekenin aıta kelip, ekologııalyq kodekske jergilikti atqarýshy bıliktiń quzyretine birinshi kategorııadaǵy úlken kásiporyndardyń qorshaǵan ortany qorǵaý baǵytynda atqaryp jatqan jumystaryn qadaǵalaýǵa múmkindik beretin erejeler engizý týraly usynys aıtty.
Qaraǵandy qalasyndaǵy N.Nurmaqov atyndaǵy mamandandyrylǵan mektep-ınternatynda bolǵan halyq qalaýlysy oqý baǵdarlamasy úsh tilde qatar júrgiziletin arnaıy klastardy kórdi jáne bilim oshaǵynyń jetistikterimen tanysty.
Senator mektep-ınternattyń ustazdar qaýymyna Elbasynyń Joldaýynan týyndaıtyn mańyzdy mindetter jaıynda jan-jaqty aıtyp berdi. Pikirlesý barysynda mektep muǵalimderi joǵary bilikti, sertıfıkaty bar muǵalimderdiń aılyǵy ósetinin aıta kelip, biliktiligi joǵary, alaıda qoldarynda sertıfıkaty joq muǵalimderdiń jaǵdaıy men olardyń eńbekaqysy týraly surady. Depýtat ýaqyty kelgende ár tútkildi máseleniń sheshimi tabylatynyn aıtty.
Prezıdent Joldaýy – basty nazarda
Senat depýtattary Erbolat Muqaev pen Narıman Tóreǵalıev Batys Qazaqstan oblysyna jumys babyndaǵy sapary aıasynda Aqjaıyq aýdanynyń turǵyndarymen kezdesti.
Chapaev aýylyndaǵy aýdandyq aýrýhana qyzmetkerlerimen, muǵalimdermen jáne jastarmen áńgimeniń basty taqyryby Prezıdent N.Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» halyqqa Joldaýy boldy.
Senatorlar Joldaýdyń mazmunyn aýyl turǵyndaryna túsindirdi jáne qoıylǵan saýaldarǵa jaýap berdi. Halyq qalaýlylary elimizdiń táýelsizdik jyldarynda qol jetken tabystary men álemdegi eń damyǵan 30 eldiń qataryna kirý jónindegi atqarylǵan jumystarǵa, ındýstrııalandyrý jáne agroónerkásip keshenin damytý máselelerine toqtaldy.
Depýtattar odan basqa jańa Salyq kodesiniń negizgi erejeleri, «2018-2020 jyldarǵa arnalǵan respýblıkalyq bıýdjet týraly» zań jáne Parlament 2017 jyly qabyldaǵan basqa da mańyzdy zańdar jaıynda áńgimeledi.
Kezdesýge qatysýshylar depýtattarǵa aýdandaǵy ózekti máseleler týraly aıtty. Aýyl turǵyndary ózderin tolǵandyratyn, atap aıtqanda turǵyn úımen qamtamasyz etý, aýyl sharýashylyǵy kooperatıvteriniń qyzmeti, balany kútýge arnalǵan járdemaqyny tóleý máseleleri týraly saýaldar qoıdy. Azamattar dárigerlik emdeý men kommýnaldyq qyzmetterdiń baǵasy ósip bara jatqanyna alańdaýshylyq bildirdi. Oqýshylar men muǵalimder E. Muqaev pen N. Tóreǵalıevqa aýyldyq eldi mekenderdi keń jolaqty ınternetpen qamtamasyz etý jónindegi jumystardy jalǵastyrý týraly ótinish aıtty. Senatorlar aýdan úshin ózekti máseleler boıynsha depýtattyq saýaldar ázirlep, tıisti memlekettik organdarǵa joldaýǵa nıettenip otyr.
Parlamentshiler aýyldyń kúndelikti ómirimen tanysyp, «Arýlar álemi» jattyǵý zalynda jáne «О́rken» ortalyǵynda, sondaı-aq basqa da áleýmettik ınfraqurylym nysandarynda boldy.
Depýtat S.Eńsegenov Atyraý oblysynda muǵalimdermen kezdesti
Parlament Senatynyń depýtaty Sársenbaı Eńsegenov Atyraý oblysyndaǵy Qurmanǵazy aýdanynda boldy, sondaı-aq Farıza Ońǵarsynova atyndaǵy orta mekteptiń muǵalimderimen jáne Atyraý kentiniń turǵyndarymen kezdesti.
S. Eńsegenov óz sózinde Memleket basshysy N.Nazarbaevtyń Tórtinshi ónerkásiptik revolıýsııa jaǵdaıyndaǵy elimizdiń damýyna arnalǵan Joldaýynyń negizgi erejelerin túsindirdi. Bilim berý salasyna qatysty senator Joldaýdaǵy «Adamı kapıtal – jańǵyrý negizi» týraly jetinshi mindetti júzege asyrýdyń mańyzyna toqtaldy. Bilim berý júıesin reformalaý qazirgi zamandaǵy ekonomıkanyń talaptary men eńbek naryǵyna saı bilikti mamandardy daıarlaýǵa baǵyttalýy tıis ekeni aıtyldy.
S. Eńsegenov «100 naqty qadam» Ult josparynda Prezıdent bilim berý júıesin álemdegi úzdik standarttary deńgeıine jetkizý jáne básekege qabilettiligin arttyrý týraly tapsyrma bergenin eske saldy. Senator sondaı-aq jas urpaq qazirgi zamanǵy tehnologııalardy tolyq ıgerý úshin barlyq mektepterdiń ınternetke qosýdyń mańyzdylyǵyn atap ótti.
Senator D. Ádilbekov Býrabaı aýdanynda boldy
Parlament Senatynyń depýtaty Dáýren Ádilbekov Aqmola oblysyndaǵy Býrabaı aýdanynda boldy. Senator aýdannyń áleýmettik-ekonomıkalyq qorytyndylarymen tanysty jáne jergilikti turǵyndarmen kezdesti.
Jergilikti ózin-ózi basqarý bıýdjetiniń tórtinshi deńgeıge kóshirilýine baılanysty mańyzdy máseleler aýdandyq ákimdiktegi keńeste talqylandy. Sharaǵa aýdandyq ákimdik basshylary, aýdandyq máslıhat depýtattary, memlekettik kiris, qazynashylyq, ádilet, statıstıka basqarmalarynyń ókilderi, jergilikti polısııa qyzmetiniń bastyǵy, aýmaqtyq okrýgterdiń ákimderi, bıýdjet baǵdarlamalarynyń ákimshileri, buqaralyq aqparat quraldarynyń tilshileri qatysty.