Jyl aıaǵynda Rýdnyı qalasy ákiminiń orynbasary Maqsut Dospolov 15 mıllıon para aldy degen aıyppen 8 jylǵa sottalǵan bolatyn. Osy dabyldy qylmystyq iske baılanysty Rýdnyı qalasynyń ákimi Baqytjan Ǵaıazovqa sógis berildi.
Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qostanaı oblysy boıynsha Departamenti basshysynyń orynbasary Erlan Salyqbaevtyń aıtýynsha, qazir qaramaǵyndaǵy qyzmetkeri sybaılas jemqorlyq qylmys jasasa memlekettik organ basshysy sol úshin qyzmetten alynatyn norma joq, biraq mundaı asa aýyr qylmys jasalǵanda únsiz qalý, baǵasyn bermeý taǵy da orynsyz.
Qazir korrýpsııalyq táýekelderdi joıýdyń basty joly ony eskertip otyrý bolyp tabylady. Erlan Salyqbaevtyń aıtqan aqparaty boıynsha, memlekettik qyzmet jumysyndaǵy reforma da osy baǵytqa arnalǵan. Negizi memlekettik qyzmetke barýǵa nıet bildiretinderdiń qatary kóp. О́tken jyly memlekettik qyzmet pen quqyq qorǵaý organdaryna qyzmetke turǵysy kelgen 5700 adam zańnamalar jónindegi bilimin tekseretin testen ótken bolatyn. Sonyń jartysy ǵana emtıhan tapsyra alǵan. Solardyń arasynda konkýrs arqyly laýazymdy orynǵa ıe bolǵandary tipti az, sebebi olar biliktilik talaptaryna sáıkes kelmegen. Kerisinshe, memlekettik organdarda, ásirese, óńirlerde bos oryndar kóp.
О́tken jyly Departament 27 memlekettik organdar men 12 uıymda sybaılas jemqorlyq táýekeline taldaý jasaǵan. Taldaý boıynsha 160 zań buzýshylyq tirkelip, joıylǵan. Qarabalyq aýdanynda ákim laýazymyn artyq paıdalanǵany úshin sottaldy. О́tken jyly barlyǵy qylmystyq jaýapkershilikke 55 adam tartylǵan, al 2016 jyly bul kórsetkish 45 bolatyn. Olar negizinen polısııa qyzmetkerleri. Korrýpsııalyq quqyq buzýdyń sanaty jóninen birinshi orynda para, ekinshi orynda laýazymdyq ókilettiligin asyra paıdalaný tur.
Názıra Járimbet,
«Egemen Qazaqstan»
Qostanaı